He malihini nahu mākaʻi ma Maui.
ʻO ia aʻela kekahi poʻo nūhou o kēia lā, ka lā 6 o Mei, he Pōʻalima. Welina e nā makamaka. ʻO Ke Aolama kēia a penei ka nūhou.
I ka Pōʻalua nei ma Maui, hopu ʻia aku nei kekahi wahine no ka hana ʻano ʻino. ʻO Corey Campbell kona inoa. He malihini ʻo ia no Makakukeka mai. Aia ʻo ia ma kekahi hale ʻaina, a hōʻole aʻela ʻo ia i ka uku ʻana i kāna pila a me ka haʻalele ʻana i ka hale ʻaina. I ka hiki ʻana aku o ka mākaʻi, ʻakahi nō a ʻae ʻo Campbell i ka uku i ka pila, ʻaʻohe naʻe ona wahi manaʻo a haʻalele. A ʻo ia kona wā i hopu ʻia ai a hoʻopiʻi ʻia ai no ka hōʻole i ka haʻalele i ia wahi a me ka hana ʻano ʻino. A ʻo kona lawe ʻia akula nō ia i ke Keʻena Mākaʻi o Kīhei. A ma hope mai, i kona wā e lawe ʻia ana i Wailuku, nahu ihola ʻo Campbell i ka lima o kekahi mākaʻi. A no laila, hoʻopiʻi hou ʻia ʻo ia no ka hōʻeha i ka mākaʻi.
Ke māhuahua aʻela nā sila Hawaiʻi. I ka makahiki 2019, he 1,435 mau sila Hawaiʻi. Akā, i ka helu ʻia ʻana i kēlā makahiki aku nei, he 1,570. ʻO ka makamua kēia o ka ʻoi ʻana aku o nā sila Hawaiʻi i ka 1,500 ma nā makahiki he 20 a ʻoi i hala. Ma mua, e emi ana ka nui o nā sila Hawaiʻi he 4% a ʻoi i kēlā me kēia makahiki.
Lanakila aku nei ʻo Hawaiʻi ma luna o Ball State i ka Pōʻahā nei ma loko o nā pāʻani ʻelima. A holo mua ai i ka puni inoa moho o ka Hoʻokūkū Inoa Moho Pōpō Paʻipaʻi o ka ʻAhahui ʻĀlapa o nā Kulanui o ʻAmelika Hui Pū. A ʻo ko Hawaiʻi hoa paio ma laila, ʻo ia ʻo Kekaha Loa. I ka Pōʻaono ka puni inoa moho. E hoʻomaka ana i ka hola 2:00 o ka ʻauinalā.
Eia mai kā kākou ʻōlelo noʻeau,
ʻO Honuʻapo aku nō ia, ʻo kahi o ka ʻahuʻawa.
He ʻōlelo kēia no ka hoka o ke kanaka. ʻO ka ʻahuʻawa, he lāʻau ia no ka hoka ʻana i ke ahu ʻawa.
Ke Aolama 