ʻO Hawaiʻi nō ka ʻoi!
ʻO ia aʻela kekahi poʻo nūhou o kēia lā, ka lā
I kēlā Pōʻakolu aku nei, haʻalele ihola ʻo Kirk Caldwell i ke alualu ʻana i ke kūlana kiaʻāina, a ʻelua wale nō koe moho, ʻo ka Hope Kiaʻāina Josh Green a me Vicky Cayetano. Akā, holo iho nei ka manaʻo o ka Lunamakaʻāinana Kai Kahele a kūkala aʻela, e haʻalele ʻo ia i kona kūlana, a e alualu i ke kūlana kiaʻāina. ʻŌlelo aʻela ʻo Kahele, kākoʻo ʻia ʻo ia e ka uniona Kūloko 625 o nā Limahana Hao a me ka uniona Kūloko 630 o nā Makona Kimeki a me nā Hamo Puna.
ʻĀhaʻi aku nei nā Kāne Ānuenue i ka lanakila ma loko o nā pāʻani ʻekolu wale nō i ka Pōʻaono nei, a lilo ai ka inoa moho pōpō paʻipaʻi o ka ʻAhahui ʻĀlapa o nā Kulanui o ʻAmelika Hui Pū iā lākou. ʻO Spyros Chakas o Hawaiʻi, ʻo ia ka Mea Pāʻani Poʻokela o ka Hoʻokūkū. I ka Pōʻaono nei, he 14 āna hoʻopio, hoʻokahi ʻeki a ʻekolu kaupoku. Ua kāʻili nō hoʻi ʻo Hawaiʻi i ka inoa moho i kēlā makahiki aku nei. Ma ka moʻolelo o ka ʻAhahui ʻĀlapa o nā Kulanui o ʻAmelika Hui Pū, he ʻelima wale nō hui i hana pēlā. ʻO nā hui ʻē aʻe, ʻo ia ʻo UC Irvine, ʻo Loyola o Kikako, ʻo ʻOhaio State a me Kekaha Loa.
Eia mai kā kākou ‘ōlelo noʻeau,
Ua lilo me ka iʻa ʻo ka lauwiliwili.
He ʻōlelo kēia no ke kanaka i huikau.
Ke Aolama 