ʻAe iho nei ka ʻOihana Moku i ke kauoha o ke Keʻena Ola.
ʻO ia aʻela kekahi poʻo nūhou o kēia lā, ka lā ʻumi kūmākahi o Mei, he Pōʻakolu. Welina e nā makamaka. ʻO Ke Aolama kēia a penei ka nūhou.
Kauoha ʻia aku nei ka ʻOihana Moku o ʻAmelika, e pau i ka hoʻolālā ʻia ka hoʻomaloʻo ʻana i nā pahu ʻaila i kanu ʻia ma Kapūkakī a maloʻo ke hiki aku i ka lā 30 o Iune. A ke hiki aku i ka lā mua o Nowemapa, e pau nō hoʻi i ka hoʻolālā ʻia ka pani ʻia ʻana o ia kahua pono lako. A ʻaʻole i kūʻē ka ʻoihana moku i ia mau kauoha.
Ua waiho ʻia ka inoa o Kalani Peʻa ma nā māhele he 11 o nā Makana Hōkū Hanohano o ka makahiki 2022. ʻO kekahi, no ka pāleo o ka makahiki ma ke ʻano he puʻukani a ma ke ʻano he mea hoʻopuka nō hoʻi. ʻO Josh Tatofi, ua waiho ʻia kona inoa ma nā māhele he ʻewalu. A ʻo kekahi hui hou, ʻo ka Tuahine Troupe, waiho ʻia ihola kona inoa no ka pāleo o ka makahiki a me ka puʻukani e ulu pono ana. ʻAʻole i paʻa ka lā e mālama ʻia ai ka ʻAha Makana Hōkū Hanohano o kēia makahiki nei.
Kau hou ka manaʻo o Max Holloway, e lilo hou ka inoa moho 145 paona iā ia. E mokomoko hou ana ʻo Holloway me Alexander Volkanovski ma ka lā 2 o Iulai ma ke Kūlanakauhale o nā ʻĀnela. ʻO ke kolu ana ia o ko lāua hui ʻana ma ka huinawalu. ʻO ka manawa mua, aia ma ka UFC 245 ma ka mahina ʻo Kēkēmapa o ka makahiki 2019, ka wā hoʻi i lilo ai ka inoa moho iā Volkanovski ma ka manaʻo lōkahi o nā luna loiloi. A he ʻehiku mahina ma hope mai, hakakā hou ihola lāua ma ka UFC 251 akā, ua mahae naʻe nā manaʻo o nā luna loiloi.
Eia mai kā kākou ʻōlelo noʻeau,
Ka ʻai kīʻoʻe lāʻau.
ʻO ka ʻulu nō ia.
Ke Aolama 