Lapa ana ka maʻi ahulau ma Kōlea ʻĀkau.
ʻO ia aʻela kekahi poʻo nūhou o kēia lā, ka lā 13 o Mei, he Pōʻalima. Welina e nā makamaka. ʻO Ke Aolama kēia a penei ka nūhou.
E mālama ana ke Kulanui o Hawaiʻi ma Mānoa he ʻekolu mau ʻaha hemo kula i kēia hopena pule. A ma mua, he paipai wale nō i nā kānaka e komo i ke pale ihu. Akā, ma muli o ka māhuahua ʻana aʻe nei o nā kānaka i loaʻa i ka maʻi ahulau, he koina ke komo pale ihu ma ia mau ʻaha hemo kula. Hoʻokahi ʻaha hemo kula o kēia lā. Aia i ka hola 5:00 o ka ʻauinalā. A he ʻelua ʻaha hemo kula o ka Pōʻaono. ʻO kekahi, aia ma ka hola 9:00 o ke kakahiaka. A ʻo ka lua, aia ma ka hapalua hola ʻekolu.
Kūkala aʻe nei ʻo Kōlea ʻĀkau, laha koke aku nei ka maʻi ahulau ma laila. Mai ka hopena o ʻApelila, make iho nei he ʻeono mau kānaka, a loaʻa aku nei he 350,00 mau kānaka i ka piwa a puni ʻo Kōlea ʻĀkau. Lapaʻau ʻia aku ia mau kānaka. A he 162,000 o lākou, ua polapola aʻela. A hoʻokaʻawale ʻia he 187,800 no ka lapaʻau ʻia ʻana. He mau hola ma hope mai o ke kūkala ʻia ʻana o ka laha koke ʻana o ka maʻi ahulau, kī aʻela ʻo Kōlea ʻĀkau he ʻekolu mau kao lele kī lewa i ke kai. ʻO ka ʻumi kūmāono ia o ka manawa i kī ai ʻo Kōlea ʻĀkau i ke kao lele i kēia makahiki nei.
Eia mai kā kākou ʻōlelo noʻeau,
ʻAʻohe kolopā nāna e une.
He ʻōlelo kēia no ke kanaka poʻo paʻakikī.
Ke Aolama 