E kau ana kekahi mau haumāna ʻelua o Hawaiʻi nei ma ka hano hāweo.
ʻO ia aʻela kekahi poʻo nūhou o kēia lā, ka lā 16 o Mei, he Pōʻakahi. Welina e nā makamaka. ʻO Ke Aolama kēia a penei ka nūhou.
ʻElua haumāna papa kiʻekiʻe loa o kekahi mau kula kiʻekiʻe o Hawaiʻi nei e kau ana i ka hano hāweo. Hoʻokoho ʻia lāua i ka papa kanalima kūmāwalu o nā Mea ʻImi Naʻauao Pelekikena ʻAmelika Hui Pū. ʻO kekahi haumāna, no ke Kula Kiʻekiʻe o Kealakehe. ʻO Kea Kahoilua Clebsch kona inoa. Na Clebsch ka ʻawelike kaha ʻoi ma ka papa kiʻekiʻe loa o Kealakehe a aia nō hoʻi ʻo ia ma nā papa holomua nui loa ma laila. Ua lilo he mau makana iā ia ma ka ʻepekema a me ka hana noʻeau. A he mau hana poʻokela hou aku. ʻO ka lua o ka haumāna, no ke Kula ʻo Punahou. ʻO Sascha Pakravan kona inoa. ʻO ke kāpena ia o ka hui haʻi ʻōlelo; he Mea ʻImi Naʻauao Coca-Cola; a he mau hana poʻokela hou aku. He 161 mau haumāna papa kiʻekiʻe loa i hoʻokoho ʻia i kēia makahiki nei.
I ka Pōʻaono nei, e kīkī ana kekahi ʻōpiopio ʻilikea i nā kānaka ma loko o kekahi hale mākeke ma Pāpulō. He 10 mau kānaka i make i ke kī pū ʻia. ʻO Payton Gendron ka inoa o ua kanaka lā nāna ia hana mānaʻonaʻo. I kī aku ʻo Gendron i ia mau kānaka ma muli o ka hoʻokae ʻili. A kohu mea lā, ua paʻa kona manaʻo, e nui loa nā kānaka Pāʻele e make iā ia. Ma hope mai o kāna hana, paʻa ihola ʻo ia i ka hopu ʻia e ka mākaʻi. I ka mahina ʻo Iune o kēlā makahiki aku nei, hoʻoweliweli aʻela ʻo Gendron, e kī ana ʻo ia i nā kānaka like ʻole ma ke Kula Kiʻekiʻe o Susquehanna Valley ma Conklin i Nū Ioka ma kahi o ka wā o ka ʻaha hemo kula. I ia manawa, lawe ʻia akula ʻo Gendron i ka haukapila i mea e ʻike ai i ka maikaʻi a me ka maikaʻi ʻole paha o kona noʻonoʻo kanaka. ʻAʻole naʻe ʻo ia i hopu ʻia i ia wā.
Eia mai kā kākou ʻōlelo noʻeau,
Pōʻino nā lāʻau aʻa liʻiliʻi i ka ulu pū me ka puakala aʻa loloa.
ʻO ia hoʻi, hoʻokūāʻino ʻia ke kanaka nona ka noʻonoʻo nāwaliwali.
Ke Aolama 