05-18-22

He puʻu kālā i hoʻokaʻawale ʻia no ka manu mūkīkī o Hawaiʻi.

ʻO ia aʻela kekahi poʻo nūhou o kēia lā, ka lā 18 o Mei, he Pōʻakolu. Welina e nā makamaka heluhelu. ʻO Ke Aolama kēia a penei ka nūhou.

Ua hoʻokaʻawale ʻia aku nei he puʻu kālā pekelala no ka pono o ka manu mūkīkī o Hawaiʻi nei. ʻO ka nui o ke kālā, he $14 miliona a e lilo ana i kekahi mau keʻena aupuni. He mau lāhui manu ʻōiwi o Hawaiʻi kai ʻane nalowale loa, no laila, he mea ka puʻu kālā e pono ai ia mau manu ʻōiwi. Ua koho ʻia, he kanahā kūmālima wale nō ʻakikiki ma Kauaʻi. A he 135 kiwikiu koe ma Maui. ʻO ka pilika, aia nō ke māhuahua aʻela ka make ʻana o nā manu ʻōiwi i ka malalia manu. Na ka makika ka hoʻolaha ʻana i ka malalia manu. A no laila, e hoʻohana ʻia ana ke kālā i mea e hoʻomōhala ai i ka polokalamu e hoʻopau ai i ka makika ma nā wahi noho o ka ʻakikiki a me ka ʻakekeʻe ma Kauaʻi a me nā wahi noho o ke kiwikiu a me ka ʻākohekohe ma Maui.

Ua loaʻa aku nei kekahi mea pahū i hana wale ʻia ma kahi o ke alaloa H-2. A ke noi aʻela ka Pulo Pekelala Kolokolo i kōkua ma ka hōʻoia ʻike maka ʻana i nā mea e pili ana i ua mea pahū lā a i nā kānaka paha nāna i hana. ʻO kahi o ia mea pahū o ka loaʻa ʻana, aia ma kahi o ke Alanui ʻo Ala Aolani. I ka lā 26 o ʻApelila i loaʻa ai. ʻO kona lōʻihi, he ʻeono ʻīniha, a ʻo kona anawaena, he hoʻokahi ʻīniha. Inā he ʻike paha kāu, e kāhea i ka Pulo Pekelala Kolokolo ma ka helu 808-566-4300.

Eia mai kā kākou ʻōlelo noʻeau,

ʻAlamihi kakani pōʻeleʻele.

He ʻōlelo kēia no ke kanaka hana kuli i ka pō.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: