ʻO Keith Hayashi ke kahu kula nui hou.
ʻO ia aʻela kekahi poʻo nūhou o kēia lā, ka lā 20 o Mei, he Pōʻalima. Welina e nā makamaka. ʻO Ke Aolama kēia a penei ka nūhou.
ʻO Keith Hayashi ke kahu kula nui kūikawā o nā kula aupuni o Hawaiʻi. A i ka pō Pōʻahā nei, hoʻokohu ʻia aʻe nei ʻo Hayashi, ʻo ia ke kahu kula nui paʻa. ʻEkolu moho hope loa, ʻo Hayashi, ʻo Caprice Young a me Darrel Galera. A lōʻihi ke kūkākūkā ʻana, a mai lilo aku ia kūlana iā Young. ʻO ka uku makahiki o ke kahu kula nui ma mua, ʻo Christina Kishimoto, he $240,000. ʻAʻole i paʻa ka uku o Hayashi, akā, ʻo ka uku kiʻekiʻe loa, he $250,000. E hoʻomaka ʻo Hayashi i ka lawelawe ʻana i ka hana ma ka lā mua o ka mahina ʻo Iulai.
Ua ʻāpono aku nei nā luna kau kānāwai o ʻOkalahoma i ka pila e pāpā ana, ʻaʻole e hoʻohemo keiki. A ʻōlelo aʻela nā wahi hoʻohemo keiki, i ke kiaʻāina nō a pūlima i ia pila, e pau ko lākou lawelawe ʻana i ka hoʻohemo keiki. Ma ia pila, ʻo nā mea wale nō e ʻae ʻia ai ka hoʻohemo keiki, ke pilikia loa ka wahine hāpai, a ʻo ka hoʻohemo keiki wale nō kona mea e ola ai. ʻO kekahi, ke hāpai ka wahine ma muli o ka puʻe wale ʻia a ma muli paha o ka moe ʻohana pili ponoʻī.
Eia mai kā kākou ʻōlelo noʻeau,
Aʻeaʻe mōhala i luna o ke kukui.
He ʻōlelo kēia no ke kanaka i hele a poʻohina.
Ke Aolama 