E kau aku ana paha kekahi kaikamahine o Hawaiʻi nei i ka hano hāweo.
ʻO ia aʻela kekahi poʻo nūhou o kēia lā, ka lā 23 o Mei, he Pōʻakahi. Welina e nā makamaka. ʻO Ke Aolama kēia a penei ka nūhou.
E lilo paha ka Makana Pulitzer ma ka māhele mele iā Anne Leilehua Lanzilotti no kāna mele i haku ai, ʻo “with eyes the color of time.” He mele ia e pili ana i nā hana noʻeau e hōʻikeʻike ʻia ana ma ka Hale Hōʻikeʻike ʻo Contemporary ma mua, i kapa ʻia ʻo Spalding Hale. He mea hoʻokani viola ʻo Lanzilotti a he haku mele nō hoʻi. A ma ke kau ʻana o ka lā i ka lolo i kēia Pōʻahā ma ke Kikowaena Kīwila o Honolulu, e hoʻokani ana ʻo Lanzilotti me kekahi mau mea hoʻokani o Hawaiʻi nei i kekahi o kāna mau mele hou i haku ai, ʻo ia hoʻi, ʻo “Sky Gate.” A i hoʻoulu ʻia ʻo ia e ka hana noʻeau a Isamu Noguchi i hana ai i kapa ʻia nō hoʻi ʻo Sky Gate. He moʻopuna kuakahi ʻo Lanzilotti na Samuel Wilder King. A he moʻopuna nō hoʻi na ka Mea Hanohano Sam King.
Ua noi aku nei ke Keʻena Hoʻokipa Malihini Mākaʻikaʻi o Hawaiʻi i nā luna kau kānāwai he $64 miliona no ka hoʻoponopono ʻana i ke Kikowaena ʻAha Hōʻike o Hawaiʻi. ʻO ka ʻoneki kaupaku, ke ua mai, he kulu nō ka ua e pōʻino ai ʻo loko o ia kikowaena. ʻO ka nui o ke kālā i noi ʻia, he $54 miliona no ka hoʻoponopono ʻana i ka ʻoneki kaupaku, a he $10 miliona no ke kūkulu ʻana i mau pālulu e hoʻomalumalu ai i ke 50 pākeneka o ka lānai kaupaku ʻole o ka ʻoneki kaupaku. Akā, ʻo ka puʻu kālā i hoʻokaʻawale ʻia e ka ʻahaʻōlelo, he $15 miliona.
Eia mai kā kākou ʻōlelo noʻeau,
ʻAi nō i kalo moʻa.
ʻO ia hoʻi, ua pau ka hana, a hiki mai ka wā hoʻonanea.
Ke Aolama 