E lei ana kekahi mau moho i ka lei o ka lanakila.
ʻO ia aʻela kekahi poʻo nūhou o kēia lā, ka lā 9 o Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.
ʻO Josh Green ke kiaʻāina hou o Hawaiʻi nei. A ʻo Sylvia Luke ka hope kiaʻāina. Ua pālua ko lāua mau pāloka i ko James “Duke” Aiona lāua ʻo Seaula “Junior” Tupaʻi ʻŌpio. ʻO Sylvia Luke, he luna makaʻāinana ʻo ia a ʻo ia ka luna hoʻomalu o ke Kōmike ʻOihana Kālā o ka Hale o nā Lunamakaʻāinana o Hawaiʻi nei.
He meia hou ana ko Maui. ʻO Richard Bissen nō ia. ʻO Bissen, ʻo ia ke poʻo lunakānāwai ma mua o ka ʻAha Hoʻokolokolo Kaʻapuni ʻElua. A ma mua o kēlā, he loio hoʻopiʻi ʻo ia no ke Kalana ʻo Maui no nā makahiki ʻewalu, a laila, ʻo ia ka hope loio kuhina ʻekahi o ke aupuni mokuʻāina o Hawaiʻi.
A ma Kauaʻi, ʻo ia mau nō ke kū ʻana o Derek Kawakami, ʻo ia ka meia.
He mau mākālua ko ke Keʻena Kuleana Hawaiʻi. A he ʻekolu kūlana no ka lehulehu. ʻO John D. Waiheʻe IV kai kāʻili i kekahi, a he luna noho nō ʻo ia. A ʻelua kahu waiwai hou ma ia mau kūlana, ʻo Brickwood Galuteria lāua ʻo Keoni Souza. ʻEono mau moho e alualu ana i ia mau kūlana ʻekolu. ʻO Leinaʻala Ahu Isa, he luna noho, ʻo ia ka helu ʻehā, a no laila, e haʻalele ana ʻo ia i ia kūlana. ʻO Chad Owens kekahi e alualu ana, akā, ʻaʻole i lawa kona mau pāloka. ʻO Owens ka helu ʻelima. A ʻo Sam Kalanikupua King ke ono. A ma ka mokupuni ʻo Hawaiʻi, ʻo ia mau nō ke kū ʻana o Mililani B. Trask, he luna noho, ʻo ia ke kahu waiwai no ia mokupuni.
Eia mai kā kākou ʻōlelo noʻeau,
Leʻaleʻa ka ʻōlelo i ka pohu aku o loko.
ʻO ia hoʻi, maikaʻi a ʻoluʻolu ke kamaʻilio ʻana ke māʻona ka ʻōpū.
Ke Aolama 