E pau ana paha ka hoʻolimalima ʻana o ka Pūʻalikoa iā Pōhakuloa.
ʻO ia aʻela kekahi poʻo nūhou o kēia lā, ka lā 14 o Nowemapa, he Pōʻakahi. Welina e nā makamaka. ʻO Ke Aolama kēia a penei ka nūhou.
I ka mahina ʻo Kepakemapa, kau aku nei ʻo Heuaʻolu Sai-Dudoit i ka hano hāweo. Lilo aku nei iā ia ka makana helu ʻekahi o ka makahiki 20 o ka Hoʻokūkū Hīmeni Leo Kiʻekiʻe ʻo Richard Hoʻopiʻi. ʻO Kalamaʻula kāna mele i hīmeni ai. ʻŌlelo aʻe nei ʻo Sai-Dudoit, na kona kupunahine kualua i haku i ia mele. A ʻo ia kekahi kumu āna i koho ai i ia mele, he hoʻohanohano ia i kona makuakāne a me kona kupunahine kualua a me nā Dudoit a pau. A ʻo ka leo nahenahe, he welo nō ia ma ka ʻohana o Heuaʻolu. He ʻanakē ʻo Marlene Sai no kona makuahine. A ma ka ʻaoʻao o kona makuakāne, he ʻohana ʻo Horace K. Dudoit III. Mai ke Kula Kiʻekiʻe ʻO Nāwahīokalaniʻōpuʻu i puka mai ai ʻo Heuaʻolu. A i kēia manawa, he haumāna ʻo ia ma ke Kulanui o Hawaiʻi ma Mānoa. ʻElua āna mēkia, ʻo ka ʻōlelo Hawaiʻi a me ka lawelawe ʻoihana.
E pau ana ka palapala hoʻolimalima a ka Pūʻalikoa no Kahi Hoʻomaʻamaʻa ʻo Pōhakuloa i ka makahiki 2029. ʻO kahi ʻāpana o ia ʻāina, he 23,000 ʻeka o nā ʻāina i kāʻili ʻia mai ke aupuni Mōʻī mai. I ka makahiki 1964 i hoʻomaka ai ka hoʻolimalima ʻana o ka Pūʻalikoa, no ke kālā hoʻokahi. A mai ia manawa mai, helu ʻia aku ia ʻāina he wahi hoʻomalu ʻia. He manaʻo ko ka Pūʻalikoa, e hoʻomau i ka hoʻolimalima ʻana i ia ʻāina, no ka mea, wahi a ka Pūʻalikoa, ʻo ia wale nō kahi ma kēia pae ʻāina nei e mālama ʻia ai ka hoʻomaʻamaʻa nui ʻana. ʻO ka poʻe kūʻē i ka hoʻomau ʻana o ka pūʻalikoa i ka hoʻolimalima ʻana i ia ʻāina, he ʻōlelo kā lākou, he mau kuleana ko ke aupuni mokuʻāina. A ʻo ia ka hoʻomalu ʻana i ia mau ʻāina e pono ai nā mea hoʻokahu ʻia.
Eia mai kā kākou ʻōlelo noʻeau,
Pili pono ka lā i Papaʻenaʻena.
He ʻōlelo kēia no ke kanaka huhū loa.
Ke Aolama 