Hoʻopiʻi aku nei ʻo Nick Rolovich i ke Kulanui o Wakinekona Mokuʻāina.
ʻO ia aʻela kekahi poʻo nūhou o kēia lā, ka lā 16 o Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.
Make aku nei kekahi mau mea pāʻani pōpō peku o ke Kulanui o Wilikinia i ke kī pu ʻia i ka pō Lāpule nei. ʻO nā inoa o ua mau mea pāʻani lā, ʻo ia ʻo Lavel Davis ʻŌpio, ʻo D’Sean Perry a me Devin Chandler. A ʻo Chandler, he haumāna ʻo ia no ke Kula ʻo Kāna Lui ma Kalaepōhaku ma mua. Ua komo ʻo ia i ka papa ʻeono a haʻalele i ia kula ma hope o ka papa ʻewalu i ka makahiki 2016 ma muli o ka neʻe ʻana aku o kona ʻohana i Tenesī. Ua ʻeha nō hoʻi he ʻelua mau haumāna i ia pō Lāpule. Hopu ʻia iho nei kekahi kanaka i manaʻo ʻia nāna ke kī pū ʻana. ʻO Christopher Darnell Jones ʻŌpio kona inoa.
Hoʻopiʻi aku nei ʻo Nick Rolovich i ke Kulanui o Wakinekona Mokuʻāina a me ke Kiaʻāina Jay Inslee no kona kaiehu ʻia ʻana ma muli o kona hōʻole ʻana, ʻaʻole ʻo ia e ʻō ʻia i ka lāʻau koʻokoʻo maʻi Kovida. He Kakolika ʻo Rolovich a noi aku nei ʻo ia i kona kāpae ʻana i ke koina lāʻau koʻokoʻo. A hōʻole ʻia ihola. Hōʻike aʻela nā luna o ke Kulanui o Wakinekona Mokuʻāina, ʻaʻohe o lākou kumu e hoʻopiʻi ʻia ai.
Hahana ka pāʻani ʻana ma ka hoʻokūkū pōpō hīnaʻi o ka pō Pōʻakahi nei, kahi i kūʻē aku ai ʻo Hawaiʻi iā Yale. I ka hopena o ka hapalua ʻelua, ua paʻi a paʻi, he 51 a Hawaiʻi a pēlā pū me Yale. Akā, na Yale i hiu aʻe a lilo aku nei ke eo iā lākou ma ka helu ʻai he 62 i ke 59. A ʻo nā ʻĪlio Pulu o Yale ke kū kilakila ana, ʻo lākou ka ʻoi o ka Hoʻokūkū Panina Ānuenue Outrigger.
Eia mai kā kākou ʻōlelo noʻeau,
Pēpē i ka ua hoʻopoponi ʻili.
He ʻōlelo kēia no ke kanaka i pā i ka leo.
Ke Aolama 