Ke Aolama

Pau ka wā komo pale ihu.

ʻO ia aʻela kekahi poʻo nūhou o kēia lā, ka lā 23 o Malaki, he Pōʻakolu. Welina e nā makamaka. ʻO Ke Aolama kēia a penei ka nūhou.

He manaʻo hou no ke kaʻa uila kau i ka lewa, ʻo ia hoʻi, e moe ke ala mai Kapolei Hikina a i nā Alanui ʻo Halekauwila a me Hema. E hāpai ʻia ana ka manaʻo, e pau i ke kūkulu ʻia ke ala ma ke Alanui ʻo Waena ke hiki aku i ka mahina ʻo Pepeluali o ka makahiki 2024. A i ka mahina ʻo Mei o ka makahiki 2029, e pau kahi hoʻolulu ma Halekauwila a me Hema i ke kūkulu ʻia a pēlā pū me ke ala. ʻŌlelo aʻela ka Meia Rick Blangiardi, ʻo ia ka māhele mua o ke kūkulu ʻana. Ma hope aku, e hoʻomau ʻia aku paha ke ala a i ke Kikowaena ʻo Ala Moana a ma ʻō aku paha.

ʻO Hawaiʻi ka mokuʻāina hope loa e kēnā ana i ke komo pale ihu. Akā, ke hiki aku i ka Pōʻaono, ka lā 26 o Malaki, e pau ana ia ʻōlelo kēnā, e komo i ke pale ihu ma nā wahi maluhale a puni ʻo Hawaiʻi nei. E kāpae loa ʻia ana ia koina ma kekahi mau wahi ma ia lā hoʻokahi nō, e like me nā kikowaena kūʻai o Kāhala a me Kalauao a me ka Hale Kiʻiʻoniʻoni ʻo Consolidated. Akā, aia nō i ka hale ʻoihana ke koi a me ke koi ʻole i ke komo pale ihu.

Pūlima aku nei ʻo Marcus Mariota i ka palapala ʻaelike me nā Palekona o ʻAtalanata. He ʻelua makahiki o ia palapala ʻaelike. Ua lilo aku nei ka ʻalihikūlele o ʻAtalanata, ʻo Matt Ryan i nā Lio Keiki o ʻInidianapolisa ma ke kuapo ʻana. A lilo aku nei kekahi koho ma ka puni ʻekolu o ke Koho Mea Pāʻani Hou o kēia makahiki nei iā ʻAtalanata. E pāʻani ana ʻo Mariota no Las Vegas ma nā kikina ʻelua i kaʻa hope aku nei, a hoʻokuʻu ʻia ai ʻo ia ma hope o ke kikina i hala iho nei.

Eia mai kā kākou ʻōlelo noʻeau,

Ua mālie, ke au nei koaʻe.

ʻO ia hoʻi, he lā mālie ia.

@font-face {font-family:”Cambria Math”; panose-1:2 4 5 3 5 4 6 3 2 4; mso-font-charset:0; mso-generic-font-family:roman; mso-font-pitch:variable; mso-font-signature:-536870145 1107305727 0 0 415 0;}@font-face {font-family:Calibri; panose-1:2 15 5 2 2 2 4 3 2 4; mso-font-charset:0; mso-generic-font-family:swiss; mso-font-pitch:variable; mso-font-signature:-536859905 -1073732485 9 0 511 0;}@font-face {font-family:Times; panose-1:0 0 5 0 0 0 0 2 0 0; mso-font-charset:0; mso-generic-font-family:auto; mso-font-pitch:variable; mso-font-signature:-536870145 1342185562 0 0 415 0;}@font-face {font-family:”Times New Roman \(Body CS\)”; panose-1:2 2 6 3 5 4 5 2 3 4; mso-font-alt:”Times New Roman”; mso-font-charset:0; mso-generic-font-family:roman; mso-font-pitch:variable; mso-font-signature:-536859921 -1073711039 9 0 511 0;}p.MsoNormal, li.MsoNormal, div.MsoNormal {mso-style-unhide:no; mso-style-qformat:yes; mso-style-parent:””; margin:0in; margin-bottom:.0001pt; mso-pagination:widow-orphan; font-size:12.0pt; font-family:Times; mso-fareast-font-family:Calibri; mso-fareast-theme-font:minor-latin; mso-bidi-font-family:”Times New Roman \(Body CS\)”;}.MsoChpDefault {mso-style-type:export-only; mso-default-props:yes; font-family:Times; mso-ascii-font-family:Times; mso-fareast-font-family:Calibri; mso-fareast-theme-font:minor-latin; mso-hansi-font-family:Times; mso-bidi-font-family:”Times New Roman \(Body CS\)”;}div.WordSection1 {page:WordSection1;}

He kanaka hou kai make i ke kī pū ʻia.

ʻO ia aʻela kekahi poʻo nūhou o kēia lā, ka lā 21 o Malaki, he Pōʻakahi. Welina e nā makamaka. O Ke Aolama kēia a penei ka nūhou.

Ua lū ʻia aku nei nā lehu o Colt Brennan ma Waikīkī i ka Lāpule nei. Nui nō nā kānaka i hele aku i kahakai o Waikīkī no ka hāʻawi aloha ʻana iā Brennan, ʻo kona mau hoa pāʻani ma mua, ʻo kāna mau kumu pōpō pekupeku, a pēlā pū me nā kānaka like ʻole.

I ka Pōʻaono nei, make iho nei kekahi kanaka i ke kī pū ʻia ma Waikīkī. Ua hopu ʻia ʻo Justice Manumalo Kaio no kona hoʻohuoi ʻia, nāna i kī pū aku i ua kanaka lā. ʻO ke kolu ia o ke kanaka i make i ka pū ma Oʻahu nei ma nā lā ʻeono wale nō i kaʻa hope aku nei. A ma ka wanaʻao Pōʻalima nei, ua make ʻo Haʻaheo Kolona i ke kī pū ʻia ma ʻUalakaʻa. Manaʻo ʻia, na Nainoa Damon ke kī ʻana aku i ka pū. A ma kēlā Pōʻalua aku nei ma Waiʻanae, make ihola kekahi kanaka i ke kī pū a ʻeha ihola he ʻekolu mau kānaka.

Ma ke kakahiaka o ka Lāpule nei, ma kahi o ka hapalua hola ʻehiku, nei ihola ke ōlaʻi ma Waikoloa ma ka moku o Keawe. ʻO kona ikaika, he 4.5. Aia nō ke ōlaʻi he 13 mile ma ka hema-komohana hema o Waimea. A he 14 mile ka hohonu.

Eia mai kā kākou ʻōlelo noʻeau,

Hele wale a lulu i nā manu.

ʻO ia hoʻi, he nui lehulehu nā kānaka.

Holo mua aku nei nā Kāne Ānuenue o Hawaiʻi ma ka hoʻokūkū inoa moho o ka ʻAhahui Komohana Nui.

ʻO ia aʻela kekahi poʻo nūhou o kēia lā, ka lā 11 o Malaki, he Pōʻalima. Welina e nā makamaka. ʻO Ke Aolama kēia a penei ka nūhou.

Ma Kaleponi i ka Pōʻakolu nei, hopu ʻia aku nei nā kānaka ʻelua i hoʻohuoi ʻia, na lāua nō i hoʻomake aku i kekahi kanaka ma kona hale ma ke Kualapa ʻo Hawaiʻiloa ma Niu. Ke kuhi ʻia iho nei, ʻo Gary L. Ruby ka inoa o ke kanaka i make. ʻO nā inoa o ia mau kānaka ʻelua i hopu ʻia, ʻo ia ʻo Juan Tejedor Baron lāua ʻo Scott Hannon. ʻŌlelo aʻela ke Keʻena Mākaʻi o Honolulu, he mau ipo ʻo Baron lāua ʻo Ruby. Ua hoʻokuʻu ʻia ʻo Hannon i ka Pōʻahā nei, no ka lawa ʻole o ka hōʻike e hoʻopiʻi ʻia ai ʻo ia. A ʻo Baron, ʻo ia mau paʻa nō a e hoʻihoʻi ʻia mai ana i Oʻahu nei.

Holo mua aku nei nā Kāne Ānuenue i ka puni wae moho o ka Hoʻokūkū Inoa Moho Pōpō Hīnaʻi o ka ʻAhahui Komohana Nui. Lanakila aku nei ʻo Hawaiʻi ma luna o Riverside ma ka helu ʻai he 68 i ke 67. He 16 wale nō kekona i koe a kani ka pū, e ʻoi ana ʻo Hawaiʻi ma ka helu ʻai he 68 i ke 65.  A i ia manawa, ʻaʻe akula ʻo Hawaiʻi iā Dominick Pickett a he 6.1 kekona i koe. Komohia aʻela nā kī noa ʻelua a Pickett. A aia ka pōpō iā Junior Madut o Hawaiʻi, a ʻaʻe ʻia ʻo ia, he 5.2 kekona i koe. Akā, hala ke kī noa a Madut a lālau akula ʻo Riverside i ka pōpō a kī akula ʻo Wil Tattersall i ke kī kolu, ʻaʻole naʻe i komohia. E kūʻē ana ʻo Hawaiʻi iā Cal State Fullerton i kēia ahiahi. A ʻo ka lanakila, e holo mua ana i ka puni inoa moho.

Eia mai kā kākou ʻōlelo noʻeau,

Ua hala ka hoʻoilo, ua mālie.

ʻO ia hoʻi, ua pau ka pilikia. A ua maluhia ka ʻāina.

Holo mua kahi pila no ka pono o ka poʻe LGBTQ+.

ʻO ia aʻela kekahi poʻo nūhou o kēia lā, ka lā 9 o Malaki, he Pōʻakolu. Welina e nā makamaka. ʻO Ke Aolama kēia a penei ka nūhou.

Aia nō ka Pila Hale 1697 ke holo mua aʻela ma ka ʻAha ʻŌlelo Kūloko o Hawaiʻi nei. He pila ia e koi ana i nā kula aupuni o Hawaiʻi i ke aʻo ʻana, ma ka papa haʻawina no ka hoʻonaʻauao ai ʻana, i nā mea maikaʻi a pono o ke aikāne, ka māhū, a me ke kanaka puni kāne a wahine hoʻi, ʻo ka poʻe LGBTQ+ hoʻi. A pēlā pū me ke kanaka ʻili ʻulaʻula a waihoʻoluʻu like ʻole hoʻi a me ke kanaka kīnā. E koi ana ka Pila Hale 1697 i ke Keʻena Hoʻonaʻauao o Hawaiʻi i ka mālama ʻana i nā papa no nā kumu ma nā kumuhana like ʻole e pili ana i ka hoʻonaʻauao ai ʻana. A ʻo kekahi mea nui, ʻo ia ka hōʻike ʻana i nā ʻano pono a pololei hoʻi o ka poʻe kīnā, ke kanaka ʻili ʻulaʻula a waihoʻoluʻu like ʻole hoʻi a me ke aikāne, ka māhū, a me ke kanaka puni kāne a wahine hoʻi, ʻo ka poʻe LGBTQ+ hoʻi, i mea e pau ai ka hilahila a e pau ai hoʻi ka hoʻohilahila ʻia ʻana o lākou. A i mea hoʻi paha e komo ai ke aloha o ke kanaka i ia mau kānaka.

Kūkala aʻela ke Kiaʻāina David Ige, e pau ke koina i ke komo pale ihu ke hiki aku i ka lā 26 o ka mahina ʻo Malaki. Akā, hōʻike aʻela ʻo ia, inā e māhuahua hou nā kānaka loaʻa i ka maʻi kolona, e koi hou ʻia ke komo pale ihu. Hōʻike mai naʻe ka luna o ke Keʻena Ola Kino o Hawaiʻi, ʻo Libby Char, ʻo nā kānaka i nui ko lākou mau makahiki a me nā kānaka i nāwaliwali loa ke pale ʻea, e hoʻomau lākou i ke komo ʻana i ke pale ihu.

Ua loaʻa aku nei kekahi kino pilau i ka mākaʻi i ka Pōʻalua nei ma kekahi hale ma ke Alanui ʻo Lelekepue Place. A ʻo ia kino pilau, aia nō ma ke kapu ʻauʻau i piha i ke kimeki. He manaʻo ko ka mākaʻi, ʻo ke kanaka i make, nona nō ia hale. A ke noi aʻela ke Keʻena Mākaʻi i ke kōkua mai i mea e loaʻa mai ai kekahi mau kānaka ʻelua i manaʻo ʻia na lāua ka hoʻomake ʻana. ʻO Juan Tejedor Baron ka inoa o kekahi, a ʻo Scott Hannon ka inoa o kekahi.

Eia mai kā kākou ʻōlelo noʻeau,

Malu ke kula, ʻaʻohe keʻu pueo.

ʻO ia hoʻi, ua maluhia.

Kū kilakila ana nā Wāhine Ānuenue.

ʻO ia aʻela kekahi poʻo nūhou o kēia lā, ka lā 7 o Malaki, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua mahuka paha kekahi kanaka o ka Haukapila Mokuʻāina o Hawaiʻi ma nā Koʻolau. ʻO Andrew Schmitke kona inoa. A ʻo ka Lāpule nei kona manawa i ʻike hope loa ʻia ai ma laila, ma ka hapalua hola ʻumi kūmālua o ke awakea. Ua hoʻopiʻi ʻia aku ʻo Schmitke no ka wāwahi hale a me ka hoʻopaipai ʻana aʻe i ka lāʻau ʻona. Akā, ua holo ka manaʻo o ka ʻaha hoʻokolokolo, ʻaʻole i lawa pono ka noʻonoʻo kanaka o Schmitke a hoʻokomo ʻia ai ʻo ia i loko o ka malu o ke Keʻena Ola o ka mokuʻāina. ʻO Schmitke, he ʻelima ona kapuaʻi me ʻehiku ʻīniha. A he 150 ona paona. He mau maka ʻālohilohi kona, a he poʻo ʻōhule nō hoʻi. Inā ʻike ʻia ʻo Schmitke, e kāhea aku i ka helu 808-586-1352 a i ka helu 911 paha.

Lanakila aku nei nā Wāhine Ānuenue ma luna o Kāna Palapala ma ka helu ʻai he 58 i ke 52 i ka Pōʻaono nei a lilo ai ka inoa moho pōpō hīnaʻi o ka ʻAhahui Komohana Nui iā lākou. A ʻo ia ka hoʻokūkū hope loa o ke kikina. I ka Pōʻakolu e hiki mai ana, e kūʻē ana ʻo Hawaiʻi i ka lanakila o ka hoʻokūkū kahi e kūʻē ana ʻo Cal State Northridge iā Bakersfield.

Aia nō ʻo ʻAmelika Hui Pū ʻIa ke kūkākūkā aʻe nei me kona mau hoa kākoʻo o ʻEulopa no ka pāpā a me ka pāpā ʻole paha i ka ʻaila komo o Lūkia. Akā, inā pāpā ʻia aku, e hopohopo ana ʻo ʻAmelika o piʻi aʻe ke kumu kūʻai o ka ʻaila.

Eia mai kā kākou ʻōlelo noʻeau,

Ka mū ʻai paka o Puʻunui.

He ʻōlelo kēia no ke kanaka hoʻouluhua iā ʻoe.

Hopu ʻia aku nei kekahi kanaka no ka limanui makawela i kekahi mau wāhine ʻĀkia ma Manahata.

ʻO ia aʻela kekahi poʻo nūhou o kēia lā, ka lā 4 o Malaki, he Pōʻalima. Welina e nā makamaka. ʻO Ke Aolama kēia a penei ka nūhou.

I kēlā hopena pule aku nei ma Manahata, Nū Ioka, limanui aku nei kekahi kanaka i kekahi mau wāhine ʻĀkia ʻehiku ma loko o nā hola ʻelua. ʻO Steven Zajonc kona inoa, a he 28 ona makahiki. A ʻakahi nō ʻo ia a hopu ʻia i ka Pōʻakolu nei ma waho o kekahi hale waihona puke ma Waenakaona. A hoʻopiʻi ʻia aku nei ʻo Zajonc no nā kalaima makawela. Kohu mea lā, ʻaʻole i kamaʻāina iki nā wāhine ʻehiku i ua kanaka lā. Ma kahi o ka hapalua hola ʻeono o ke ahiahi Lāpule nei, kuʻi akula ʻo Zajonc i ka wahine mua, he 57 ona makahiki. A he 10 minuke ma ia hope mai, kuʻi hou akula ʻo ia i ka lua o ka wahine, he 25 ona makahiki. A mai ia manawa mai a ma kahi o ka 20 minuke i koe kani ka hola 9:00, limanui hele akula ʻo ia i nā wāhine ʻē aʻe he ʻelima.

Make iho nei kekahi wahine a me kāna kaikamahine i ke aumoe Pōʻaono nei ma Nānākuli. ʻO Kelsey Palisbo ka wahine a ʻo Leah Hanakahi kāna kaikamahine. Ua kū ihola ko lāua kaʻa e kau ana ma ke Alanui ʻo Haleakalā a ʻo ia ka manawa i hoʻokuʻi ʻia aku ai e kekahi kalaka e holo nui ana a make ai lāua. Wahi a ka mākaʻi, ʻo ka holo nui a me ka wai ʻona kekahi mau kumu o ia ulia kaʻa. ʻO ia mea kalaiwa, ʻekolu ona manawa i hoʻopaʻi ʻia ai no ka holo nui ʻana. I ka makahiki 2018, ua hoʻopaʻi ʻia ʻo ia no ka holo pupule ʻana he 66 mile o ka hola ma ke kāʻei 35 mile o ka hola. A i ka makahiki 2019, ua hoʻopaʻi ʻia ʻo ia no ka holo nui ʻana he 73 mile o ka hola ma ke kāʻei 55 mile o ka hola.  A ma ka makahiki 2020, ua uku ʻo ia he $267 no ke kalaiwa ʻana he 105 mile o ka hola ma ke kāʻei 45 mile o ka hola.

Eia mai kā kākou ʻōlelo noʻeau,

Haʻalele ʻo Makanikeoe.

ʻO ia hoʻi, ʻaʻohe maluhia a ʻaʻohe hoʻi aloha.

Aloha nō. Pilikia loa ihola kahi hale ma Paumalū.

ʻO ia aʻela kekahi poʻo nūhou o kēia lā, ka lā 2 o Malaki, he Pōʻakolu. Welina e nā makamaka. ʻO Ke Aolama kēia a penei ka nūhou.

Ua hāneʻe ihola kekahi hale ma kahi o Paumalū. Aia nō ia hale ma ke Ala ʻo Ke Nui. A i ka Pōʻakahi nei i hāneʻe iho ai. ʻAʻole hiki ke noho ʻia aku ua hale lā. Ua pau ka pono. Ma laila ʻo Suzanne Case, ka luna hoʻomalu o ke Keʻena ʻĀina a Waiwai Pili ʻĀina i ke kakahiaka o ka Pōʻakahi nei i mea e ʻike ai i ka pilikia. He manaʻo ko nā kānaka mea hale ma ia ʻāina, e kūkulu ʻia he mau pani kai paʻa a he mau pōhaku nunui paha i ʻole e ʻaʻai ʻia ke one. Akā, wahi a Case, he pāpā ʻia aku ia mau mea ma Hawaiʻi nei no ka mea, he mea ia e pau ai kahakai. ʻO kekahi mea paha e pakele ai nā hale, ʻo ko lākou hoʻoneʻe ʻia ʻana. Akā, ʻaʻohe wahi mea a makemake o nā kānaka nona ia mau hale e hana pēlā.

Lilo mai nei he $25,000 iā Michelle Le Iwasaki. He kumu ʻo ia no ke Kula Haʻahaʻa o Kalihi Kai. A lilo mai nei iā ia ka Makana Mea Hoʻonaʻauao ʻo Milken. I kēia makahiki kula nei, he 60 a ʻoi mau kānaka hoʻonaʻauao i kau i ka hano hāweo ma ka lilo ʻana o ia makana iā lākou. He kumu ʻo Iwasaki ma ka papa mālaaʻo, ka papa ʻekahi, ka papa ʻehā a me ka papa ʻelima. ʻAʻole ʻo ia aʻo i nā papa maʻa mau. ʻO kāna mea e aʻo ai, ʻo ia nā hana e pono ai ka holo mua ʻana ma ke kula, ʻo ka hoʻolālā ʻana i ka hoʻokō ʻana i nā haʻawina a pēlā aku. Mālama nō hoʻi ʻo Iwasaki i nā hana hoʻomōhala ʻoihana kumu.

E mālama ʻia ana he hālāwai hōʻeuʻeu i ka Pōʻakolu, kēia lā hoʻi, no ke kōkua ʻana iā ʻUkalena. Aia ana ma ka Pāka ʻo Ala Moana. Wahi a Yaryna “Rainy” Volynska, i mea ia hālāwai ʻana e alu like ai nā kānaka i nui ke aloha i nā kānaka o ʻUkalena a e manaʻo nei hoʻi e hōʻike aku i ko lākou kūʻē i ia hana kū ʻole i ka pono me ka hōʻike hoʻi i ke kākoʻo i nā kānaka o ʻUkalena.

Eia mai kā kākou ʻōlelo noʻeau,

Hāʻupu, mauna kilohana i ka laʻi.

He ʻōlelo kēia no ke kanaka i kū i ka niʻo.

He manaʻo paha ko Vladimir Putin e kī aku i nā kao lele nukelea.

ʻO ia aʻela kekahi poʻo nūhou o kēia lā, ka lā 28 o ka Pepeluali, he Pōʻakahi. Welina e nā makamaka. ʻO Ke Aolama kēia a penei ka nūhou.

Kauoha aku nei ka Pelekikena Vladimir Putin o Lūkia e liuliu nā pūʻali nukelea a mākaukau loa. Wahi a Putin, i kauoha ʻo ia pēlā ma muli o nā ʻōlelo hōʻoiʻoi a ka ʻAhahui Kuʻikahi ʻAkelanika ʻĀkau a me nā hana hoʻohāiki waiwai. A e hopohopo ana kekahi poʻe o hoʻouka ʻia auaneʻi ke kaua nukelea. Ua pau nā kānaka he 422,000 a ʻoi i ka haʻalele iā ʻUkalena no Pōlani. Akā, he 22,000 mau kānaka i komo i loko o ʻUkalena no ke kūpale ʻana i ko lākou ʻāina hānau. Ke manaʻo ʻia nei, e kōkua ana ʻo Belarusa iā Lūkia ma ka hoʻouna ʻana i nā koa i loko o ʻUkalena i ka Pōʻakahi.

Hele mai nei ke Kuhina ʻOihana Moku o ʻAmelika Hui Pū ʻIa, ʻo Carlos Del Toro, i Hawaiʻi nei i ka Pōʻalima nei no ke kūkākukā ʻana i ka ʻinoʻino o ka wai i ka ʻaila. Ua mālama ʻo ia i hālāwai me nā ʻohana ʻoihana moku, a mākaʻikaʻi aku nei i kahi hoʻāhu ʻaila o Kapūkakī, a kipa aku nei nō hoʻi i nā kaiāulu o ke Kahua Pūʻalikoa o Puʻuloa a me Hickam no ke kamaʻilio ʻana me nā kānaka e noho ana ma laila. ʻŌlelo aʻela ʻo Del Toro, “Ke kuʻupau aku nei mākou i ka hana me ka paʻa o ka manaʻo e hōʻoia i ke ola a me ka palekana o ko Hawaiʻi, a pēlā pū nō me nā ʻohana pūʻalikoa. A i loko nō o nā pilikia he nui hewahewa, ʻaʻole i kana mai ka holo mua a he pono iā mākou ke noke i ke alu like ma ka hana i mea e hilinaʻi hou mai ai lākou.”

Eia mai kā kākou ʻōlelo noʻeau,

Alahula Puʻuloa, he alahele na Kaʻahupāhau.

He ʻōlelo kēia no ke kanaka hele i nā wahi a pau, a ʻike i nā mea a pau, nā hana hewa nō hoʻi paha o ʻAmelika Hui Pū ʻIa.

He kahu waiwai hou ko ke Keʻena Kuleana Hawaiʻi.

ʻO ia aʻela kekahi poʻo nūhou o kēia lā, ka lā 25 o Pepeluali, he Pōʻalima. Welina e nā makamaka. ʻO Ke Aolama kēia a penei ka nūhou.

Ua moe aku nei ʻo Oswald “Oz” Stender i ka moe kapu o Niolopua i ka Pōʻakolu nei. Ua piha nā makahiki he 90 iā ia. Ua lilo ʻo Stender i kahu waiwai no ka Waiwai Hoʻoilina o Pīhopa a me nā Kula ʻo Kamehameha i ka makahiki 1990. He ʻeiwa ona makahiki i hana ai ma ia kūlana a haʻalele ihola. I ka makahiki 1999 ma mua o kona haʻalele ʻana, ua hoʻopiʻi aku ʻo Stender i mea e hoʻopau ʻia ai ka noho ʻana o Lokelani Lindsey i kahu waiwai no ka Waiwai Hoʻoilina. A kipaku ʻia ʻo Lindsey a pēlā nō me nā kahu waiwai ʻē aʻe ma ia makahiki hoʻokahi nō. I ka makahiki 2000, lilo akula ʻo Stender i kahu waiwai no ke Keʻena Kuleana Hawaiʻi. A ma laila ʻo ia i hana ai a kona hoʻomaha loa ʻana i ka makahiki 2014.

ʻO Mililani Trask ke kahu waiwai hou o ke Keʻena Kuleana Hawaiʻi no Hawaiʻi moku. Ma ka puni ʻekolu o ke koho pāloka ʻana, he ʻeono pāloka o Trask, hoʻokahi pāloka o Lanakila Mangauil, a hoʻokahi pāloka o Kaloa Robinson. Ua haʻalele ʻo Keola Lindsey i kona kūlana kahu waiwai i ka lā mua o Pepeluali. A ʻo ia ke kumu e ʻimi ana ke Keʻena Kuleana Hawaiʻi i pani hakahaka. E lawelawe ana ʻo Trask i ka hana a ka lā koho pāloka, ka lā 8 hoʻi o Nowemapa.

Eia mai kā kākou ʻōlelo noʻeau,

He niuhi ʻai holopapa o ka moku.

He ʻōlelo kēia no ke koa ikaika.

He ulia mokulele pinao ma Kauaʻi.

ʻO ia aʻela kekahi poʻo nūhou o kēia lā, ka lā 23 o Pepeluali, he Pōʻakolu. Welina e nā makamaka. ʻO Ke Aolama kēia a penei ka nūhou.

Ua kuʻu ʻino ihola kekahi mokulele pinao ma Kahi Kī Kao Lele o ka Pākīpika ma Nōhili i Kauaʻi. A make ihola he ʻehā mau kānaka. Ma mua o ia kuʻu ʻino ʻana, e hoʻolahalaha ana ua mokulele pinao lā he 1,000 kapuaʻi ma luna aʻe o ke ala holo mokulele i ka wā e hoʻokuʻu ʻia ana kekahi mau mea a i ka honua. A i ia manawa nō, ua huli wale ka mokulele i ka ʻākau a huli ana ka ihu i lalo a lele ana i lalo me ka māmā loa a kuʻu ʻino ihola. Manaʻo ʻia, ua hele ka pailaka a huikau lewa loa.

He mau pila ma ka ʻAha ʻŌlelo Kūloko o Hawaiʻi nei, e pāpā ana, ʻaʻole e hoʻokae ʻia nā kānaka ma ka polokalamu kōkua uku hoʻolimalima. Nui loa nā wahi e ʻae ʻole ana i ka Paukū 8. ʻO ka Paukū 8, ʻo ia ka polokalamu pekelala nāna e kōkua i nā ʻohana, nā ʻelemākule a me nā kānaka kīnā ma ka uku ʻana i ka uku hoʻolimalima. ʻO nā Pila Kenekoa 2399 a me 206, e ʻae ana i ka mea hoʻolimalima wahi noho i ka hoʻopiʻi i ka haku hale inā hoʻohuoi ʻia, ua hōʻole ʻia ʻo ia ma muli o ka pila ʻaiʻē o ia polokalamu pekelala.

Eia mai kā kākou ʻōlelo noʻeau,

ʻŌpā nā kuku o Waimea.

ʻO ia hoʻi, ua luhi nā wāwae ma hope o ka hele loa ʻana.