10-06-17

He ulia kaʻa ma Mākaha kahi i make ai kekahi kanaka o Waiʻanae.

ʻO ia aʻela kekahi poʻo nūhou o kēia lā, ka lā 6 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

Aloha nō. Make ihola kekahi kanaka ma ka ulia kaʻa o ka wanaʻao o ka Pōʻahā nei ma kahi o ka Pāka Kahakai o Keaʻau ma Mākaha. ʻO Troy Kahooilihala ʻōpio ka inoa o ua kanaka lā, a he 21 wale nō ona makahiki. ʻO ka mea nāna e kalaiwa ana i ke kaʻa e kau ana ʻo Kahooilihala, ua ʻona, a e holo nui ana nō hoʻi. A ʻaʻole i hoʻopaʻa ʻo Kahooilihala i ka ʻili kuapo. Aia ʻo ia ma ka noho o hope a lele akula ʻo ia i waho o ke kaʻa. ʻO ka mea kalaiwa a me ka ʻōhua e noho ana ma ka noho ʻōhua o mua, ua paʻa nō ka ʻili kuapo. Ua lawe ʻia lāua i ka haukapila ma ke kūlana kūkonukonu. Wahi a ka mākaʻi, ʻo ke kolu kēia o ka make ulia kaʻa i pili i ka holo nui a me ka wai ʻona ma Oʻahu nei i kēia makahiki nei. A he wahi ʻōlelo aʻo kā ka makuakāne o Kahooilihala ʻōpio, ʻo ia hoʻi, mai kalaiwa ma lalo o ka malu o ka wai ʻona. E kāhea aku i kekahi. He mea ʻole ka hola o ka lā a me ka pō paha.

ʻAʻole i hele pū aku ʻo Chris Naeole me nā Koa Ānuenue i Nevada no ka hoʻokūkū pōpō peku i kēia hopena pule. ʻO Naeole, ʻo ia ke kumu aʻo laina kūlele. A ʻaʻole nō hoʻi ʻo ia i hele i ka hoʻomaʻamaʻa i ka Pōʻakolu a me ka Pōʻahā. Nīnau ʻia ke poʻo kumu aʻo Nick Rolovich no Naeole, akā, ʻaʻole ʻo ia i pane mai. ʻO ka lima kēia o ke kikina a Naeole e hana ana ma ke ʻano he kumu aʻo no ke Kulanui o Hawaiʻi. A he keu kāna hana a ka maikaʻi. Lana ka manaʻo, e hoʻi hou ʻo ia i ka hana.

Eia mai kā kākou ʻōlelo noʻeau,

Ma Koʻolau e ʻōlelo ai, he lohe ma Kona.

He ʻōlelo kēia no kahi ʻōlelo i laha koke ma ka ʻāina.

10-04-17

E hiki ana ke lele aku i Sinapoa mai Hawaiʻi aku.

ʻO ia aʻela kekahi poʻo nūhou o kēia lā, ka lā 4 o ʻOkakopa, he Pōʻakolu. Welina e nā hoa. ʻO Ke Aolama kēia a penei ka nūhou.

He manaʻo ko ka Hui Mokulele ʻo Hawaiian e hoʻonui aku i nā wahi o ka Moananuiākea a me ʻAmelika ʻĀkau e lele aku ai kona mau mokulele. ʻO Hono Kaona kekahi wahi e manaʻo ʻia nei. A wahi a ka Luna Nui Hoʻokō, ʻo Mark Dunkerley, he makemake ko ka hui e lele aku nā mokulele i ʻEulopa. A he mea maikaʻi ia no ia hui, ʻoiai, ʻakahi nō a puka ua hui mokulele nei mai ka panakalupa i ka mahina ʻo Iune o ka makahiki 2005. A i kēia manawa, ʻo ka Hui Mokulele ʻo Hawaiian kekahi o nā hui mokulele nui loa o ka waiwai a puni ʻo ʻAmelika Hui Pū ʻIa, a pēlā nō hoʻi paha a puni ke ao nei.

A e hoʻomaka ana kekahi hui mokulele o Sinapoa e lele mai i Hawaiʻi nei. ʻAʻohe hui mokulele i lele kona mokulele i Hawaiʻi nei mai Sinapoa mai, mai ka makahiki 1992. ʻO Scoot ka hui mokulele nona ka mokulele e lele mai ana i Honolulu nei. E haʻalele aku ana ka mokulele o Scoot iā Sinapoa i ka Pōʻakahi, ka Pōʻalua, ka Pōʻalima a me ka Pōʻaono. A e lele mua ana i Osaka, Iāpana. A mai kēia lā aku a i ka lā 29 o ʻOkakopa, he emi loa ka huakaʻi lele puni, mai Honolulu aku a i Osaka, he $280 a ʻoi, a mai Honolulu aku a i Sinapoa, he $480 (Ma o Osaka nō e lele ai.). E hoʻomaka ka huakaʻi lele puni ʻana i ka lā 19 o Kēkēmapa.

Eia mai kā kākou ʻōlelo noʻeau,

Nā kōhi kelekele a Kapuʻukolu.

He ʻōlelo kēia ke nui loa ka mea ʻai ʻono ma ka ʻaha ʻaina a me ka pāʻina paha.

10-03-17

ʻAkahi nō a male ke Kamaliʻiwahine Abigail Kawananakoa me kāna ipo.

ʻO ia aʻela kekahi poʻo nūhou o kēia lā, ka lā 3 o ʻOkakopa, he Pōʻalua. Welina e nā makamaka heluhelu. ʻO Ke Aolama kēia a penei ka nūhou.

He mau hale papaʻi ʻalokio hou kai ke kūkulu ʻia, a ʻo ke kumu kūʻai o ke keʻena noho o ia mau hale papaʻi ʻalokio hou, he $1 miliona a ʻoi. ʻO ia ʻo Park Lane Ala Moana a me Waiea. A i ka Pōʻalima nei, kūʻai ʻia mai nei kekahi keʻena noho o ia hale papaʻi ʻalokio no ke kālā he $22 miliona. A ʻo ia ke keʻena noho ʻalokio pipiʻi loa i kūʻai ʻia ma ka moʻolelo o Hawaiʻi nei. I ka makahiki 2014, ʻo ke kumu kūʻai kiʻekiʻe loa, he $10 miliona, akā, ma Park Lane i ka mahina ʻo ʻAukake, kūʻai ʻia kekahi no $18.8 miliona. A ʻo kekahi, he $29 miliona, ʻaʻole naʻe ia i kūʻai ʻia. A ma Waiea, i kēlā makahiki aku nei, he $35 miliona o kekahi keʻena noho, a he $36 miliona o kekahi, ʻaʻole naʻe i kūʻai ʻia. ʻO ka nui o nā keʻena noho ma Park Lane, he 219, a pau ihola i ke kūʻai ʻia he 95 pākeneka, ʻo ia hoʻi, he 208 keʻena noho. A ʻo ka huina pau, he $900 miliona. ʻO wai lā ka poʻe kānaka i kūʻai i ia mau keʻena noho? He pipiʻi hoʻi kau a koe aku.

I ka Lāpule nei, male aku nei ke Kamaliʻiwahine Abigail Kawananakoa me kāna ipo, me Veronica Gail Worth. Wahi a lāua, e mālama ʻia ana kahi pāʻina liʻiliʻi a e kono ʻia ana nā ʻohana a me nā hoa. ʻO Kawananakoa, he 91 ona makahiki, a i ka lā 18 o Iune, loaʻa aku nei ʻo ia i ke kūhewa. A i ia manawa, hoʻāʻo ihola kona loio e lilo ke kuleana o ka waiwai noho kahu nāna e lawelawe ma muli o ka manaʻo, ʻaʻole hiki iā Kawananakoa ke hana no kona pono iho. Akā, kūʻē ʻo Worth me ke kūpaʻa, he hiki nō iā Kawananakoa ke lawelawe i kona mau kuleana. He makemake ko Worth, e hoʻi ke kuleana ma lalo o Kawananakoa. A lilo ihola ia i mea hoʻopaʻapaʻa nui ʻia ma ke kānāwai.

Eia mai kā kākou ʻōlelo noʻeau,

E! Loaʻa akula ke kalo, ʻo ka ʻapowale.

ʻO ia hoʻi, he hoʻopau manawa kāu hana.

10-02-17

ʻAʻole paha e hoʻokō nei ke Keʻena ʻĀina Hoʻopulapula i kona kuleana.

ʻO ia aʻela kekahi poʻo nūhou o kēia lā, ka lā 2 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.

ʻAʻole i kūkulu iki ʻia kahi noho e ke Keʻena ʻĀina Hoʻopulapula i ka makahiki waihona kālā i pau aku nei i ka lā 30 o Iune. A i ia manawa, he $30 miliona kālā pekelala o ka waihona, i hoʻolilo ʻole ʻia. A ʻo ka mea minamina, ʻo ka nui o nā Kānaka Maoli a puni kēia pae ʻāina, e kakali nei ʻo ka loaʻa mai o kahi noho, he 22,000 a ʻoi. ʻO ka hapalua like o ia helu, aia ma Oʻahu nei. ʻO kekahi pilikia, mai ka makahiki 2002, e lilo ana he $10 miliona kālā i ke Keʻena ʻĀina Hoʻopulapula i kēlā me kēia makahiki no ke kākoʻo ʻana i ka poʻe Kānaka Maoli uku makahiki haʻahaʻa i kūpono ka noho ʻana ma ka ʻāina hoʻopulapula, ʻaʻole naʻe i hoʻolilo pono ʻia ke kālā, ua hele a māhuahua ia puʻu kālā, he $55 miliona kālā. A no laila, i ke au iā Barack Obma, i ka makahiki 2015, hoʻēmi ʻia ihola ka puʻu kālā i hoʻokaʻawale ʻia no ka Hawaiʻi a i ka makahiki 2016, ua hoʻopau loa ʻia ma muli o ka nui o ke kālā i lilo mai, ʻaʻole naʻe i hoʻolilo ʻia aku. Aloha nō. ʻO ka Hawaiʻi ka luaahi. ʻO kekahi mau hana a ke Keʻena ʻĀina Hoʻopulapula i kēlā makahiki aku nei, ʻo ia ka hāʻawi ʻana aku i ka ʻāpana ʻāina i nā ʻohana he 76 ma Maui a ma nā Koʻolau o Oʻahu nei. A he $7.5 miliona i hōʻaiʻē ʻia no ke kūʻai hale, A he $7.8 miliona kālā i hoʻolilo ʻia no ka hoʻoponopono hale. A lawelawe ʻia nā hana aʻo kūʻai hale i nā ʻohana he 160. ʻO ka pilikia paha, ʻo ke Keʻena ʻĀina Hoʻopulapula, he keʻena ia ma lalo o ke aupuni mokuʻāina.

Aia nō kahi kanaka e kī wale aʻe ana i nā kānaka ma kahi ʻaha mele ma Las Vegas. Hoʻomaka ihola ke kīkī ʻana i ka hola 10:07 o ka pō Lāpule. I ka ʻauinalā Pōʻakahi, he 59 mau kānaka i make, a he 527 mau kānaka i ʻeha a he mau mea hou aku paha. Ua loaʻa ihola ka mea nāna ke kī ʻana ma kona lumi ma ka Hōkele Mandalay Bay, ua hoʻomake ihola ʻo ia iā ia iho. ʻO Stephen Craig Paddock kona inoa, a he 64 ona makahiki. ʻAʻole i maopopo kona kumu i hana ai i ia hana mānaʻonaʻo. Akā, ma kona lumi, he 16 mau pū laipela, a hoʻokahi pū panapana. A i ka ʻimi ʻana o ka mākaʻi i ka hale o Paddock, he 18 mau pū hou, nā mea pahū a me nā pōkā he nui.

Eia mai kā kākou ʻōlelo noʻeau

He kēhau hoʻomaʻemaʻe ke aloha.

ʻO ia hoʻi, ʻo ke aloha, he mea ia e pau ai ka ʻeha o ka naʻau.

09-29-17

Holo ihola ka manaʻo o ka Papa ʻĀina a Pili Waiwai ʻĀina.

ʻO ia aʻela kekahi poʻo nūhou o kēia lā, ka lā 29 o Kepakemapa, he Pōʻalima. Welina e nā makamaka. ʻO Ke Aolama kēia a penei ka nūhou.

I ka lā i nehinei, ʻāpono iho nei ka Papa ʻĀina a Waiwai Pili ʻĀina i ka palapala kūkulu no ka ʻOhe Nānā Kanakolu Mika. A hōʻike aʻela nā Kū Kiaʻi Mauna i ka paʻa o ko lākou manaʻo e hana i ka mea e pono ai. ʻŌlelo aʻela ʻo Kahoʻokahi Kanuha, kekahi o nā Hawaiʻi Alakaʻi Kapu Aloha, ʻo ka ʻāpono ʻana o ka Papa ʻĀina a Waiwai Pili ʻĀina, ua hoʻoholo ʻē ʻia he mau mahina aku nei a he mau makahiki aku nei nō paha, a ua hiki i ka Papa ʻĀina a Waiwai Pili ʻĀina ke hoʻoponopono i ka hewa, halahū ihola naʻe. ʻO kekahi mea i ʻōlelo paʻa ʻia e ka poʻe Aloha ʻĀina, e hoʻopiʻi hou ana i mua o ka ʻAha Hoʻokolokolo Kiʻekiʻe o Hawaiʻi. A no laila, ʻaʻole i paʻa ka lā e hoʻomaka ai ke kūkulu ʻia ʻana o ka ʻohe nānā. Wahi a ka luna hoʻomalu o ka papa, ʻo Suzanne Case, ʻo ia kekahi o nā ʻōlelo paʻakikī loa a ka papa i hoʻoholo ai. A ʻōlelo nō hoʻi ʻo ia, ua hoʻolohe pono lākou a kau paona ihola i nā mea i hāpai ʻia e nā Kū Kiaʻi Mauna. ʻAʻole i ʻāpono wale ka papa i ka palapala kūkulu, he mau hana ke hoʻokō ʻia, e laʻa ka hoʻopau ʻana i kekahi mau ʻohe nānā ʻekolu e kū nei a me ka pāpā ʻana i ke kūkulu hou ʻana i nā hale e kū nei. Akā, hōʻike aʻela ʻo Kealoha Pisciotta, ka Hawaiʻi Alakaʻi o ka Mauna Kea Hui, ma muli o ke kāpae koke ʻia o kekahi mau ʻōlelo a ka ʻaoʻao hoʻopiʻi a me ka holo wikiwiki ʻana o ka manaʻo, kohu mea lā, ua koho ʻē ʻia ke ala hele i mea e kō ai ka wā kūkulu ma ʻApelila. Ua ʻōlelo ke Kulanui o Hawaiʻi, ka mea nāna i noi i ka palapala kūkulu, he pono a kaulike ka ʻōlelo hoʻoholo. Hōʻike aʻela ka hui ʻo Hawaiʻi Unity and Liberation Institute, ʻo HULI, e nui ana nā Hawaiʻi e alu like ana no ke kū ʻana i ka pono ma Mauna Kea no ka hoʻomalu ʻana i ka ʻāina a me ko kākou ʻano he Hawaiʻi a me ko kākou ʻano he lāhui kanaka.

E mālama ʻia ana kahi ʻaha oli i kapa ʻia ʻo ka “Hana Noʻeau a ka Mea Oli” i kēia hopena pule ma Oʻahu nei. Eia mai nā mea oli o ia ʻaha, ʻo Keliʻi Reichel, ʻo Kaumakaiwa Kanakaʻole, ʻo Taupouri Tangaro, ʻo Keawe lāua ʻo Tracie Lopes, ʻo Snowbird Bento, ʻo Hiwa Vaughn-Darvall, ʻo Kapalaiʻula DeSilva, ʻo Keliʻi Ruth, ʻo Kekai Robinson, ʻo Kale Kaʻalekahi a me ka ʻOhana Mossman. Aia ana ka ʻaha i ka Hale Hana Keaka ʻo Kennedy ma ke Kulanui o Hawaiʻi ma Mānoa. ʻElua manawa e mālama ʻia ai ka ʻaha oli, i ka hola 7:00 o ke ahiahi Pōʻaono, a me ka hola 3:00 o ka ʻauinalā Lāpule. He $35 o ka likiki. E kāhea aku i ka helu 956-7677 no kahi ʻike. ʻO nā pōmaikaʻi e loaʻa mai, no ka Waihona Kūkulu Hale ʻo Hālaukeʻalaokamaile.

Eia mai kā kākou ʻōlelo noʻeau,

I kai nō ka iʻa, mali ʻē ka makau.

ʻO ia hoʻi, e hoʻomākaukau ʻoe a mākaukau.

09-28-17

ʻO kahi pēpē, ua loaʻa i ka maʻi koʻe akemāmā ʻiole.

ʻO ia aʻela kekahi poʻo nūhou o kēia lā, ka lā 28 o Kepakemapa, he Pōʻahā. Aloha mai e nā makamaka heluhelu. ʻO Ke Aolama kēia a penei ka nūhou.

Loaʻa aku nei kekahi i ka maʻi koʻe akemāmā ʻiole, a ʻo ka mea e lele ai ka hauli, he pēpē wale nō ia no Puna, Hawaiʻi. ʻAkahi nō a hōʻoia ʻia e ke Keʻena Ola o ka Mokuʻāina ʻo Hawaiʻi. Ua ʻai hewa paha ua pēpē nei i ke kamaloli a pūpū paha. Aia nō ʻo ia ke waiho akula ma ka haukapila me ka lapaʻau ʻia ʻana. ʻO ka ʻumi nō ia o ka mea i loaʻa i ka maʻi akemāmā ʻiole ma ka mokupuni ʻo Hawaiʻi i kēia makahiki nei. A ʻo ka huina pau a puni kēia pae ʻāina, he 17. Ke noi aku nei ke Keʻena Ola i nā mākua mea keiki a me nā kānaka mālama keiki, e makaʻala i ka wā e pāʻani ai nā keiki i ʻole lākou e kiʻi aku i ke kamaloli a pūpū paha a hoʻokomo i ko lākou waha, a e kōkua i nā keiki ma ka holoi ʻana i ko lākou lima ma hope o ka pāʻani ʻana. A ʻo nā mea ʻai a pau, e uhi pono ʻia i ʻole e kolo ʻia e ke kamaloli a me ka pūpū.

Ua māhuahua loa aʻela nā kānaka i loaʻa i ka ʻauwaepahāha. ʻO ka ʻāʻīpahāha a me ka pēheu kekahi mau inoa. ʻO ka nui o nā kānaka, he 384 i kēia makahiki nei, a ʻo ka hapanui o lākou, ma Oʻahu nei nō. He maʻi lele nō ka ʻauwaepahāha, a ua hōʻoia ʻia, ʻo nā kānaka makua a me nā keiki i ʻō ʻia a i ʻō ʻole ʻia nā mea i loaʻa aku i ua maʻi lā. ʻO ka hapanui o nā maʻi, he 18 makahiki a ʻoi. A no laila, ke paipai ʻia nei ka lehulehu, e ʻō hou ʻia i ka lāʻau koʻokoʻo. ʻO ka ʻōuli o ka ʻauwaepahāha, kohu palū, ʻo ia hoʻi, he piwa, ka ʻeha o ke poʻo, ka unā a me ke kanea. A ʻo ka ʻōuli nui, ʻo ia ka pehu o ka mea o loko nāna e hoʻokuʻu i ka hāʻae ma kahi o ke ā.

Eia mai kā kākou ʻōlelo noʻeau,

Haʻahaʻa haka, pau i ka ʻīlio.

ʻO ia hoʻi, e mālama pono ʻoe i kāu mau mea o lilo auaneʻi iā haʻi.

09-27-17

Hoʻokuʻu ʻia aʻela kekahi mau ʻalalā.

ʻO ia aʻela kekahi poʻo nūhou o kēia lā, ka lā 27 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Ua hoʻokuʻu ʻia aʻe nei he ʻeono ʻalalā ma ka ʻĀina Hoʻomalu ʻo Puʻu Makaʻala i ka Pōʻalua nei i mea e māhuahua ai ka ʻalalā ma ka nāhelehele, ʻoiai, ʻaʻole i ʻike ʻia aku ka ʻalalā ma ka nahele mai ka makahiki 2002. ʻO nā ʻalalā ʻeono i hoʻokuʻu ʻia, he ʻelua mau wāhine, ʻehā kāne. I ka mahina ʻo Kēkēmapa o kēlā makahiki aku nei, hoʻokuʻu ʻia akula kekahi mau ʻalalā, a make loa ihola ʻekolu ma ka pule mua. ʻElua o lākou ʻekolu, ua make i ka ʻio, a ʻo ke kolu, ua make i ka ʻino. ʻO nā ʻalalā i koe, ʻohi hou ʻia aʻela no ke aʻo ʻana iā lākou i ka ʻalo ʻana aku i nā manu hoʻopōʻino e like me ka ʻio. I ka mahina ʻo ʻOkakopa, e hoʻokuʻu ʻia he mau ʻalalā hou, he ʻelima ka nui, he mau wāhine a he mau kāne. Ke manaʻo ʻia nei, he 12 mau manu e hoʻokuʻu ʻia i kēlā me kēia makahiki ma nā makahiki ʻelima e hiki mai ana. Ua laha loa ka ʻalalā ma Hawaiʻi moku ma mua loa, a lana ka manaʻo, e laha hou.

Ke hoʻopiʻi ʻia nei ka hui nona ka Hale Inu Lama ʻo Snappers ma Waikīkī no ke kekohala i nā limahana wahine, ʻo ia hoʻi, ʻo ka hoʻopā wale aku i nā wahi hilahila a me ka nānā wale ma ke ʻano kuko hewa, a me ka hoʻopuka i nā ʻano ʻōlelo kūpono ʻole me ka nemanema pū ʻana. A ʻo Michael Wenzel ka ʻona o ia hale inu lama, a ʻo ia kekahi ma ia ʻano hana lapuwale. A i ka hoʻomaopopo ʻana o nā limahana i ka hui nona ka hale inu lama, ʻaʻohe wahi mea i hana ʻia, a no laila, waiho akula ia mau limahana i ko lākou kūlana hana i ʻole lākou e nemanema hou ʻia a kekohala hou ʻia paha.

Eia mai kā kākou ʻōlelo noʻeau,

Kuʻi ka pōhaku, ʻanapa ke ahi o ka lewa.

ʻO ia hoʻi, ʻo ka hekili a me ka uila.