12-06-17

E hiki ana ke hoʻomākaiʻkaʻi iā loko o ʻIolani Hale.

ʻO ia aʻela kekahi poʻo nūhou o kēia lā, ka lā 6 o Kēkēmapa, he Pōʻakolu. Welina e nā makamaka. ʻO Ke Aolama kēia a penei ka nūhou.

ʻO ka lā hānau o Kapiʻolani ka lā 31 o Kēkēmapa. A no laila, e hiki ana ke hele mākaʻikaʻi iā loko o ka Hale Aliʻi ʻo ʻIolani. Mai ka lā 28 o Kēkēmapa a i ka lā 30, e mālama ʻia ana ka hoʻomākaʻikaʻi ʻana. I ka lā 28, e mālama ʻia ana ka hoʻomākaʻikaʻi ʻana no nā kiʻi maka nunui, he 300 ka nui. A ʻo ke kikiki, he $95 o ke kanaka makua, he $25 o ke keiki i piha nā makahiki he ʻelima a i ka 12, a ʻo ka poʻe keiki nona nā makahiki he ʻehā a ma lalo iho, he manuahi ke komo ʻana. A e hīmeni ana kekahi mau puʻukani a he mau mea hoʻokani kekahi i ia ahiahi, ʻo Kamakakehau Fernandez, ʻo Kaulalua, ʻo Kūpaoa, ʻo Puamana, ʻo ʻIwalani Apo, ka mea hoʻokani piano ʻo Eric Shank a me kekahi mau puʻukani o ke Keʻena Keaka Mele ʻo Mae Z. Orvis o ka Hale Keaka Mele Hawaiʻi a me ka Hui Hoʻokani Pila Nui o Hawaiʻi. A ma ka holoē o luna, e hīmeni ana ʻo Puamana, ʻo Hoʻopono Wong a me Kaiao i nā mele i haku ʻia e ka Mōʻīwahine Kapiʻolani a me nā Lani ʻEhā. I ka lā 29 a me ka lā 30, e hoʻomaka ka hoʻomākaʻikaʻi ʻana i ka hola 5:30 o ka ʻauinalā a e pau i ka hola 9:30. He mau kikiki hoʻopaʻa, he $30 o ke kanaka. Akā, ʻo ke kikiki maʻa mau, he $20 o ke kanaka makua, he $10 o ke keiki, a ʻo ke keiki he ʻehā makahiki a ma lalo iho, he manuahi ke komo ʻana.

ʻAʻole i ʻōlelo ke ahi, ua ana ia. Aia nō ke ahi ke lalapa akula ma Kaleponi Hema. A ma muli o ka ikaika o ka makani o ka Pōʻalua nei, he 50 mile o ka hola, ʻaʻole i hiki ke kōkua ka mokulele a me ka mokulele pinao ma ka hoʻokuʻu ʻana i ka wai kinai. Lana ka manaʻo, e hiki ana ke lele nā mokulele i kēia lā, akā, kohu mea lā, e ikaika hou ana ka makani. Ua hoʻohaʻalele ʻia he 200,000 mau kānaka a emi iho mai ko lākou mau hale aku, a pau ihola i ke ahi he 200 hale a emi mai. A ʻo ka mea pōmaikaʻi, ʻaʻohe ola i pōʻino.

Eia mai kā kākou ʻōlelo noʻeau,

Eia aʻe ka makani Kona.

ʻO ia hoʻi, ke hele maila ke kanaka huhū.

12-05-17

Hoʻokuʻu hewa aku ka mākaʻi i kahi kanaka i paʻa i ka hopu ʻia.

ʻO ia aʻela kekahi poʻo nūhou o kēia lā, ka lā 5 o Kēkēmapa, he Pōʻalua. Welina e nā makamaka. ʻO Ke Aolama kēia a penei ka nūhou.

Hoʻokuʻu hewa aku nei ke Keʻena Mākaʻi o Honolulu i kahi kanaka i hopu ʻia i ka lā mua o Nowemapa. ʻO Gregory LaBar ka inoa o ua kanaka lā a i hopu ʻia ʻo ia no ka noho ʻana ma kahi pāka o Waikīkī i nā hola pāpā ʻia. A ʻike aku nei ka mākaʻi, e ʻimi ana ke Keʻena Mākaʻi o ke Kalana ʻo Webb ma Tekeka iā LaBar. I ke kamaʻilio ʻana o nā keʻena mākaʻi ʻelua, hōʻole ihola ke Keʻena Mākaʻi o Webb i ka hoʻouna ʻana iā LaBar i laila ma muli o ka pipiʻi. ʻO kekahi pilikia i ʻike ʻole ʻia e ke Keʻena Mākaʻi o Honolulu, ua mahuka ʻo LaBar mai ka Haukapila Lapaʻau Noʻonoʻo ʻo Kahi Mohala i ka lā 28 o Kepakemapa. A ma ia lā nō, hōʻike aʻela ʻo Kahi Mohala, ua waiho nō i hōʻike mahuka i mua o ke Keʻena Mākaʻi o Honolulu a me ka Māhele Mākaʻi Nui o ke aupuni mokuʻāina. A i ia pō ʻana iho, hoʻolaha akula ke Keʻena Hoʻomalu Lehulehu i ka mahuka ʻana o LaBar. No laila, ʻaʻole i maopopo ke kumu i ʻike ʻole ai ka mākaʻi he mahuka ʻo ia ala. Aia nō ʻo LaBar ke holo wale akula ma Oʻahu nei. ʻO kona lōʻihi, he 6 ona kapuaʻi me ʻelua ʻīniha, he 177 ona paona, he lauoho hāʻehuʻehu kona me nā maka keleawe. Inā ʻike paha ʻoe iā LaBar, e kāhea aku i ka helu 911 a i ʻole ia, i ke Keʻena Mākaʻi Nui ma ka helu 586-1352.

Kau aʻe nei ka ʻōlelo hoʻoholo o ka ʻAha Hoʻokolokolo Kiʻekiʻe o ʻAmelika Hui Pū ʻIa e ʻae ana i ka hoʻokō piha ʻana o ka papa luna hoʻokele a ka Pelekikena Donald Trump i ka pāpā ʻana i ka huakaʻi ʻana mai o nā kupa o Kada, ʻIlana, Libia, Somalia, Siria a me Iemene i ʻAmelika Hui Pū ʻIa. Ke ʻōlelo nei ka poʻe kūʻē i ia pāpā ʻana, he mea hoʻokae ia i ka poʻe Mohameka, ka poʻe hoʻomana ʻIsalama hoʻi. ʻO ka mea ʻāpiki, ʻaʻole ia ʻo ka ʻōlelo hoʻoholo hope loa a ka ʻAha Hoʻokolokolo Kiʻekiʻe no ka pāpā huakaʻi. Aia nō ke kūʻē ʻia akula ma kekahi mau ʻaha hoʻokolokolo pekelala.

Eia mai kā kākou ʻōlelo noʻeau,

ʻOhi hāpuku ka makapehu o Kaunu.

He ʻōlelo kēia no ke kanaka ʻālunu nāna e lawe i nā mea a pau, ʻo ka mea maikaʻi a me ka mea maikaʻi ʻole.

12-04-17

Kū kilakila ana kahi keiki o Waiʻanae.

ʻO ia aʻela kekahi poʻo nūhou o kēia lā, ka lā 4 o Kēkēmapa, he Pōʻakahi. Welina e nā makamaka. ʻO Ke Aolama kēia a penei ka nūhou.

I ka Pōʻalima nei, mai kaʻa aku ka lanakila i nā Wāhine Ānuenue ma ka puni mua o ka Hoʻokūkū Inoa Moho Pōpō Paʻipaʻi o ʻAmelika Hui Pū ʻIa. Lilo nā pāʻani mua ʻelua iā ʻIlinoe ma ka helu he 25 i ka 18 a he 25 i ka 17. Akā, hiu aʻela ʻo Hawaiʻi a kāʻili ihola i ke eo ma ka pāʻani ʻekolu me ʻehā. Akā, ma ka lima o ka pāʻani, ikaika hou aʻela nā wāhine o ʻIlinoe a ʻo ka lilo akula nō ia o ka lanakila iā lākou.

ʻAʻole i lilo aku ka inoa moho mokomoko 145 paona, ua paʻa mau nō iā Max Holloway. Lanakila hou aku nei ʻo ia ma luna o Jose Aldo i loko o nā puni ʻekolu. A ʻo ka lua ia o kona manawa i kū kilakila ai ma hope o ka mokomoko ʻana me Aldo. ʻO ka manawa mua, aia i Iune o kēia makahiki nei. No Holloway, ʻo kona lanakila 12 ia, kekahi ma hope o kekahi.

Kohu mea lā, he manaʻo ko Conor McGregor e hui pū me Holloway ma ke kahua mokomoko. ʻO McGregor ka inoa moho 145 paona ma mua, a ʻo ia ka inoa moho 155 paona i kēia manawa. Akā, ʻo Frankie Edgar ana paha ka hoa paio o Holloway. Ua paʻa ihola ʻo Edgar ka hoa paio o Holloway i ka Pōʻaono nei, akā, ma muli o ka ʻeha o Edgar, ua kū mai ʻo Jose Aldo i pani hakahaka. A no laila, ke kuhi ʻia nei, ʻo Edgar ana ka hoa paio ke komo hou ʻo Holloway i ke kahua mokomoko.

Eia mai kā kākou ʻōlelo noʻeau,

Komo mai kāu māpuna hoe.

ʻO ia hoʻi, e kōkua.

11-30-17

ʻAʻole i maopopo ke kumu i make ai kekahi mau iʻa o Kaʻula.

ʻO ia aʻela kekahi poʻo nūhou o kēia lā, ka lā

Ua nui aʻela nā iʻa make o Kaʻula ma hope o ka lū ʻia ʻana o ka maunu ʻiole. ʻO ia maunu, he lāʻau hoʻomake ʻiole ia e pau ai nā ʻiole o ia mokupuni. A i mea e ʻike ai i ke kumu o ka make ʻana o ia mau iʻa, ʻo ia mea hoʻomake ʻiole paha, ua nānā ʻia aku nā ʻāpana ʻaʻaʻa o nā iʻa. Akā, ua pau ka pono o ke kūlana o ia mau ʻaʻaʻa e hiki ʻole ai ke ʻike inā ʻo ia lāʻau hoʻomake ʻiole ka mea i make ai ka iʻa, a ʻo kekahi mea ʻē aku paha. Ma mua o ka lū ʻia ʻana o ia lāʻau hoʻomake ʻiole, nui nā kānaka o ke kaiāulu e hopohopo ana i ka pilikia o nā mea o ke kai a puni ʻo Kaʻula.

Pōmaikaʻi kekahi poʻe kau kaʻa ʻōhua. ʻO ke kaʻa lawe ʻōhua nāna e holo mai Kalihi a i Waikīkī, ʻo ke ala 2 ia, e hoʻomaka kona holo ʻana he 24 hola o ka lā, ma nā lā a pau o ka pule. A i ke kakahiaka nui o ka Lāpule e hiki mai ana e hoʻomaka kona holo ʻana pēlā. Ma mua, pau ihola ka holo ʻana o ke kaʻa lawe ʻōhua ala 2 i ka hola 2:00 o ka wanaʻao. A hoʻomaka hou i ka hola 4:00. Ma ka lā like o kēlā makahiki aku nei, hoʻomaka ihola ka holo ʻana o ke kaʻa lawe ʻōhua ala 40, mai Mākaha a i ke Kikowaena ʻo Ala Moana, he 24 hola o ka lā i nā lā a pau o ka pule.

Eia mai kā kākou ʻōlelo noʻeau,

Neʻe aku, neʻe mai ke one o Punahoa.

He ʻōlelo kēia no ka mahae lua o kekahi hui kanaka, ʻo ka ʻAha Kenekoa a ʻo ka hui hoa aloha paha.

11-29-17

Waiho inoa ʻia kekahi mau puʻukani o Hawaiʻi nei no ka Makana Grammy.

ʻO ia aʻela kekahi poʻo nūhou o kēia lā, ka lā 29 o Nowemapa, he Pōʻakolu. Aloha mai e nā hoa makamaka. ʻO Ke Aolama kēia a penei ka nūhou.

E lilo paha kahi Makana Grammy i kekahi puʻukani mele Hawaiʻi. Ua waiho inoa ʻia ʻo Hoʻokena a me Josh Tatofi no ka māhele Pāleo Mele Aʻa. ʻO ka inoa o ke pāleo a Hoʻokena, ʻo ia ʻo “Hoʻokena 3.0.” A ʻo kā Tatofi, ʻo ia ʻo Pua Kiele.” Ua lilo aku ka Makana Hōkū Hanohano 2017 iā Tatofi no ka Puʻukani Kāne o ka Makahiki a me ka Pāleo Mele ʻAilana. A e lilo paha kahi Makana Grammy i kekahi puʻukani o Hawaiʻi nei, ma ka māhele Pāleo Mele Iāmeka, ka Rēkē hoʻi. ʻElua puʻukani o Hawaiʻi i waiho inoa ʻia ma ia māhele, ʻo ia ʻo J Boog a me Common Kings.

He manaʻo ko ke kūlanakauhale o Honolulu e hoʻomau i ka hoʻopiha ʻana i ka waihona ʻōpala o Oʻahu Komohana. I kēia manawa, he 1.2 miliona kona ʻōpala o ka makahiki ma ke kūlanakauhale o Honolulu. Akā, he 71,000 wale nō kona e hiki aku i ka waihona ʻōpala, ʻoiai he nui nā kona e puhi ʻia i ke ahi a e hoʻopōʻaiapuni ʻia paha. Ma kahi hōʻike, ʻōlelo ʻia, ua lawa ka lumi o ia waihona ʻōpala no ke kiloi ʻōpala ʻana a i ka makahiki 2038. A no laila, ʻaʻole pono ke koho ʻana i kēia manawa i wahi hou e kūkulu ʻia ai ka waihona ʻōpala hou. Aia a hiki aku i ka makahiki 2028, a laila, e hoʻomaka i ka ʻimi ʻana i wahi hou. Wahi a ka Meia Kirk Caldwell, ʻaʻole ʻo ia e ʻae aku i waihona ʻōpala hou ma ka ʻaoʻao komohana o Oʻahu nei. Hōʻike maila ʻo Caldwell, ʻaʻole pono ke ʻimi aku i wahi hou, ʻo kāna hana me kāna poʻe hoʻokō, ʻo ia ka ʻimi ʻana i mea e emi hou ai ka ʻōpala o kēlā me kēia lā.

Eia mai kā kākou ʻōlelo noʻeau,

Hele kā hoʻi a hiki i Keālia, ua napoʻo ka lā.

He ʻōlelo kēia no ke kanaka hoʻopaneʻe mau aku i ka hana.

11-28-17

E pōmaikaʻi ana kekahi mau ʻōiwi Hawaiʻi i ka loaʻa mai o kahi ʻāina hoʻopulapula.

ʻO ia aʻela kekahi poʻo nūhou o kēia lā, ka lā 28 o Nowemapa, he Pōʻalua. Welina e nā makamaka. ʻO Ke Aolama kēia a penei ka nūhou.

E kūkulu ana ke Keʻena ʻĀina Hoʻopulapula he 160 mau hale ma Kapolei. A i kēia Pōʻaono e koho ai nā ʻōiwi he 160 i pā hale ma ke kaiāulu ʻo Kaʻuluokahaʻi. E hoʻomaka ana ka noho ʻia ʻana o nā hale i kēia kau wela aʻe. ʻO ka māhele mua ia o Kapolei Hikina II e kūkulu ʻia nei e ke Keʻena ʻĀina Hoʻopulapula ma uka aʻe nei o ke Kahua Kolepa Kaiāulu o ʻEwa. ʻO ka nui o nā hale e kūkulu ʻia ana ma laila, he 1,000. I kēia manawa, he nui hewahewa nā ʻōiwi, he 22,000 mau kānaka a ʻoi, e kali nei ʻo ka loaʻa mai o kahi noho hoʻolimalima. A ma kahi o ka hapalua o lākou, eia ke kali nei ʻo ka loaʻa mai o kahi noho ma Oʻahu nei.

E hoʻohalahala ana ʻo Oswald Stender, he kahu waiwai Kamehameha ma mua, i nā luna o nā Kula ʻo Kamehameha o nā makahiki 1990 no ka noiʻi ʻole ʻana aku i nā ʻōlelo hōʻike no ka lolokukui ʻana o ke kauka hoʻoponopono noʻonoʻo i nā haumāna. ʻO Kauka Robert Browne ka inoa o ia kauka, a he mau haneli haumāna kāna o ka lolokukui ʻana mai ka hopena o nā makahiki 1950 a i nā makahiki mua o o nā makahiki 1980. I ka makahiki 1991, ua lawe ihola ʻo Browne i kona ola ponoʻī ma hope iki mai o ka hele ʻana o kekahi haumāna ma mua a kū ana i mua o Browne he alo a he alo me ka nīnau ʻana aku iā Browne no kāna hana lolokukui ʻana iā ia. Ma hope iho o ka lawe ʻana iho o Browne i kona ola, ua nui aʻela nā kānaka i hōʻike no ko lākou lolokukui ʻia e Browne. Aia nō ke hoʻopiʻi akula he 34 mau haumāna a Browne i lolokukui ai i nā Kula ʻo Kamehameha, ka waiwai hoʻoilina o Browne a me ka Hale Maʻi ʻo Kāna Palani no ka mālama ʻole a me ka hoʻomalu ʻole i nā haumāna.

Eia mai kā kākou ʻōlelo noʻeau,

Uhiuhi lau māmane ka wai o Kapāpala.

He ʻōlelo kēia no ka hoʻonalonalo ʻana o kekahi i ka hana hewa a kekahi.

11-27-17

Lōʻihi loa paha ka pahū ʻana o kekahi hōkū.

ʻO ia aʻela kekahi poʻo nūhou o kēia lā, ka lā 27 o Nowemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

ʻAkahi nō a ʻike ʻia kahi hōkū i pahū he mau manawa i loko o nā makahiaki he 50 a ʻoi. ʻO ka mea maʻa mau i ʻike ʻia ma mua, he hoʻokahi wale nō manawa o ka hōkū o ka pahū ʻana. I ka makahiki 2014 i ʻike mua ʻia ai ka pahū ʻana o ka hōkū, akā, he mau mahina ma hope mai, ʻike ʻia aku ka ʻalohi hou ʻana o ia hōkū hoʻokahi nō, a emi iho, a ikaika hou ia ʻalohi ʻana, a pēlā ka hana he mau manawa. A loaʻa maila nō kahi mea e hōʻike ana i ka pahū ʻana o kahi hōkū ma ia wahi hoʻokahi nō he 60 mau makahiki ma mua. ʻO ka mea maʻa mau, pau ka pahū ʻana o ka hōkū i loko o nā lā he haneli, akā, ʻo kēia pahū ʻana, ʻaʻole i pau, a he 1,000 mau lā a ʻoi i hala. Akā, aia nō ke emi ihola kona ʻalohi. ʻO nei hōkū i pahū, ua kuhi ʻia, he hōkū ia i pāhaneli kona nui i ko kākou lā.

Ua paʻa ihola ka hoa paio o nā Wāhine Ānuenue ma ka puni mua o ka Hoʻokūkū Inoa Moho Pōpō Paʻipaʻi. I kēia Pōʻalima ko lākou wā e kūʻē aku ai iā ʻIlinoe. A inā lanakila ʻo Hawaiʻi ma luna o ʻIlinoe, ʻo Wakinekona ana paha ko lākou hoa paio ma ka puni ʻelua.

Eia mai kā kākou ʻōlelo noʻeau,

Kukū ka pihapiha a piʻi ka lena.

He ʻōlelo kēia no ke kanaka huhū.

11-22-17

Ua loaʻa paha kekahi mau koa kahiko i ka maʻi ʻaʻai ma muli o ka iʻa i ʻai ʻia ma ko lākou wā ma Wiekanama.

ʻO ia aʻela kekahi poʻo nūhou o kēia lā, ka lā 22 o Nowemapa, he Pōʻakolu. Welina e nā makamaka heluhelu, ʻo Ke Aolama kēia a penei ka nūhou.

Aloha nō nā koa kahiko ʻAmelika o ke Kaua Wiekanama. Ua loaʻa aku nei kekahi o lākou i ka maʻi ʻaʻai ma ka pūʻali wailena ma muli o ko lākou ʻai ʻana i ka iʻa maka a i ka iʻa paha i moʻa maka ma Wiekanama. Ke ʻai aku i ka iʻa i moʻa pono ʻole, aia nō ka mea omoola, a ʻo ia ka mea i loaʻa ai ia mau koa kahiko i ka maʻi ʻaʻai. ʻO ka mea ʻāpiki, aia wale nō a hala he mau ʻumi makahiki, a laila, ʻōʻili mai nā ʻōuli. ʻO ka pilikia, i ia wā e ʻōʻili iho ai nā ‘ōuli, ua pau paha ke kino i ka ʻehaʻeha, a he mau mahina wale nō paha koe, a ʻo ka make nō ia. Inā lapaʻau koke ʻia, ʻaʻole e pilikia ke kanaka. He 700 paha mau koa kahiko i loaʻa i ia maʻi ʻaʻai, i hele aku i ke Keʻena Kuleana Koa Kahiko ma nā makahiki he 15 i hala. Akā, he hapa iki wale nō kai noi aku i kōkua, ʻoiai, ʻaʻole lākou i ʻike he pili ia maʻi i kā lākou hana ma Wiekanama. A ua hōʻole aku ke Keʻena Kuleana Koa Kahiko i ke 80 pākeneka o ia mau noi. He 41 mau noi i kēlā makahiki aku nei, a i kēia makahiki nei, he 60 noi. Akā, he ʻekolu hapahā a emi iho o ia mau noi, ua hōʻole ʻia.

Eia mai kā kākou ʻōlelo noʻeau,

Noho maialile ka ua o Hilo, ʻelua wale nō māua.

Na Kanuha i hoʻopuka i kēia ʻōlelo i ka wā o ke Kahunapule Titus Coan i nuku aku iā ia no ka hana kūpono ʻole ma ka Lā Kāpaki. E hōʻike ana ʻo Kanuha, ʻo lāua ʻo Kiaʻāina Kuakini nā mea nui. ʻAʻole ʻo Coan. A inā aia nō kekahi o lāua, ʻaʻohe wahi mea a kauoha aku o Coan. A i kēia wā, he pane kēia i ke kanaka e kuhihewa ana, ʻo ia ka luna. E hōʻike ana ia ʻōlelo, e hāmau, ʻaʻole ka luna ʻo ʻoe.

11-21-17

He mea hou kai lele mai i loko o ko kākou kahua hōkū.

ʻO ia aʻela kekahi poʻo nūhou o kēia lā, ka lā 21 o Nowemapa, he Pōʻalua. Welina e nā makamaka. ʻO Ke Aolama kēia a penei ka nūhou.

I ka lā 19 iho nei o ʻOkakopa, ʻakahi nō a ʻike ʻia kahi mea e lele ana ma waena o nā hōkū i komo mai i loko o ko kākou kahua hōkū a lele akula i waho. He hōkū liʻiliʻi ia a ʻo kona lōʻihi, he 2,625 kapuaʻi a he pāʻumi ia i kona laulā. A he kākaʻikahi ka ʻike ʻia ʻana o ia ʻano mea loloa ma ko kākou kahua hōkū. Ua kapa ʻia nō ua hōkū liʻiliʻi lā ma ka inoa Hawaiʻi. ʻO ʻOumuamua kona inoa, a ʻo ia ihola ka inoa ma hope o ke kūkākūkā ʻana o nā mea akeakamai me Larry Kimura a me Kaʻiu Kimura, he mau loea ʻōlelo Hawaiʻi o ke Kulanui o Hawaiʻi ma Hilo. Ua kohokoho ʻia, kāʻalo kahi hōkū liʻiliʻi e like me ʻOumuamua i loko o ke ala pōʻai o ka Honua i kekahi mau manawa o ka makahiki. Paʻakikī naʻe ka ʻike ʻana, akā, ma muli o ka ikaika o nā ʻohe nānā hou, he hiki nō ke ʻimi a loaʻa. ʻAʻole i maopopo kahi i hele mai ai ʻo ʻOumuamua. Kuhi ʻia, e lele mai ana mai kahi mai o ka hōkū ʻo Vega ma ka ulu hōkū ʻo Kehoʻoea. Akā, ʻaʻole ʻo Vega ma ia wahi i ka wā i kāʻalo ai ʻo ʻOumuamua i laila, he 300,000 mau makahiki i hala. A ʻo kekahi manaʻo o nā kilo hōkū, e lele wale ana ʻo ʻOumuamua ma ka Iʻaleleiaka, ʻaʻole i paʻa i kahi kahua hōkū, he mau haneli miliona makahiki, a kipa maila i ko kākou kahua hōkū.

ʻO ia mau nō ka paipai ʻana o ke Keʻena Ola, e ʻō ʻia kānaka i ka lāʻau koʻokoʻo maʻi pēheu ʻoiai ke māhuahua aʻela nā kānaka i loaʻa i ua maʻi lā ma Hawaiʻi nei. I ka Pōʻalima nei, ʻo ka nui o nā kānaka i hōʻoia ʻia ko lākou loaʻa ʻana i ka maʻi pēheu, he 575. I ka Pōʻakahi, ua hōʻike aku ke Kulanui Kaiāulu ʻo Kapiʻolani i nā kumu, nā haumāna a me nā limahana i ka loaʻa o kekahi o ia kahua kula i ia maʻi, ʻo ia ka mua o ia kahua kula.

Eia mai kā kākou ʻōlelo noʻeau,

Nāpelepele nā pali o Kalalau i ka wili a ka makani.

He ʻōlelo kēia no ke kanaka i pau i ka luhi.

11-20-17

Kū kilakila ana nā inoa moho pōpō pekupeku o nā kula kiʻekiʻe o Hawaiʻi.

ʻO ia aʻela kekahi poʻo nūhou o kēia lā, ka lā 20 o Nowemapa, he Pōʻakahi. Aloha e nā makamaka heluhelu. ʻO Ke Aolama kēia a penei ka nūhou.

ʻAkahi nō a ʻāpono ka ʻAha ʻŌlelo Lāhui i ka pila papa hana kūpale e hoʻokaʻawale ana he $700 biliona. A wahi a ke Kenekoa Brian Schatz, mai loko mai o ia haʻawina kālā, he $300 miliona a ʻoi no ke kūkulu pūʻalikoa ma Hawaiʻi.

He mau hoʻokūkū pōpō pekupeku inoa moho hahana nō ko ka pō Pōʻaono nei. ʻO ka mua, e kūʻē aku ana ʻo Lahainaluna iā Konawaena no ka inoa moho Māhele II. I ka hopena o ka hapahā ʻehā, ua paʻi a paʻi, he 31 i ke 31. A kuʻupau akula nā ʻaoʻao ʻelua no nā wā kaulele he ʻehiku. A ma ka hiku o ka wā kaulele, i nā Pōpoki ʻĀhiu ka mua, a mai lilo aku ka ʻai holo iā lākou. Hiki akula lākou i ka ʻīā ʻekahi, a ma ka hina ʻelua, pakemo ihola ka pōpō a lilo akula iā Elijah Oliveira-Kalalau o Lahainaluna. A ma hope mai o kēlā, paʻa ihola kahi ʻai holo i nā Luna a lilo ai ka inoa moho iā lākou ma ka helu ʻai he 75 i ke 69.

A no ka inoa moho Māhele I, ʻo Kāna Lui ke kūʻē aku ana iā Kahuku. Na Kahuku ka ʻai holo mua. Akā, ma hope mai, hiu aʻela ʻo Kāna Lui a i ka hapahā ʻekolu, e ʻoi ana ʻo Kāna Lui ma ka helu ʻai he 24 i ka 7. ʻO ka wā ia i hoʻoikaika ai nā keiki o Kahuku a paʻa he ʻekolu ʻai holo a ʻo ka helu ʻai i ia manawa, he 28 i ka 24. Akā, i ka wā he 37 kekona i koe, nou lōʻihi akula ka ʻalihikūlele o Kāna Lui, ʻo Chevan Cordeiro i ka pōpō a hopu akula ʻo Jonah Panoke, a paʻa ka ʻai holo. Hoʻāʻo ihola ʻo Kahuku e hiki hou i ka pahu ʻai holo, ʻaʻole naʻe i hiki. A ʻo Kāna Lui ka inoa moho mokuʻāina Māhele I. A ʻo ka lima ia o nā inoa moho mokuʻāina o nā Koa Kelukake.

Eia mai kā kākou ʻōlelo noʻeau,

Hoʻokahi ka ʻilau like ʻana.

ʻO ia hoʻi, e alu like.